Ilulissat pinngortitamut siunnersorteqalerput
Ilulissani katersugaasivik qanittukkut pinngortitaq pillugu siunnersortimik atorfinitsitsivoq. Pinngortitaq pillugu siunnersorti kikkunnilluunniit atorneqarsinnaavoq, suliassaanullu ilaassapput pikkorissartitsinerit, oqalugiarnerit kiisalu pinngortitaq kulturilu pillugit paasititsiniaajutigaluni angallassisarnerit.
Ilulissani katersugaasiuviup pisortaata Kirsten Strandgaard-ip pinngortitaq pillugu siunnersorteqalernertik isumalluarfiginerarpaa:
-Pinngortitaq pillugu siunnersorteqaleratta oqaluttuarisaanerup kulturip avatangiisit pinngortitallu ataqatigiinnerat pillugu paasissutissiinissatsinnut periarfissarissaarnerulerpugut, tassa inuit iliuusaasa tamarmik pinngortitamut sunniuteqartarnerat illuatungaanilu pinngortitap inunnut sunniutai pillugit innuttaasut pitsaanerusumik paasissutissinneqarsinnaalissapput, Kirsten Strandgaard oqarpoq. Ilulissat avataanit tikerarneqarluartartut sermeqarfissuartillu pillugu nunarsuarmi tusaamasaasut pinngortitaq pillugu siunnersorteqarnissaat pissusissamisoornerarpaa. Meeqqattaaq avatangiisinik paarsilluarnissaq pillugu ilisimasaqarlualernissaat taamaasilluni aamma aqqutissiuunneqartoq Kirsten Strandgaard oqarpoq.
Ilulissani pinngortitaq pillugu siunnersortertaap
Naja Habermann-ip, juunip aallaqqaataaniit atorfittaava Ilulissat kommunianit avatangiisinullu aqutsisoqarfimmit aningaasalerneqarpoq. Ilulissat saniatigut sinerissami kommuneqarfiit pingasut, Upernavik, Sisimiut Nuullu pinngortitamut aamma siunnersorteqarput. Siunnersorteqarnerup ukiuni tulliuttuni misiligutitut ingerlanneqartussap atajuaannartunngortinneqarumaarnissaa Ilulissani katersugaasiviup pisortaata neriuutiginerarpaa.
