Ilulissat kisiartaalluni raajanik qajuusaasiortarpoq

Raajat minnerit eqqakkallu ulluni makkunani eqqartorneqaqaat. Ilulissat kisiartaalluni sinneruttunik qajuusaasiortartuummat Ilulissani pisut aallaavigalugit assersuuteqassaagut:

Ilulissaniinnaq raajat mikivallaat qalipaannut ilanngullugit raajanik qajuusaasiarineqartarput, sinerissami tunisassiornermi raajat minnerit sinneri tammaannartartut. Raajat mikingaaramik tunisassiornermi tammaannartarput, Steen Sørensen, Royal Greenlandip qullersaqarfianeersoq, KNR-mut oqarpoq.

Royal Greenland ullumikkut pingasunik raajaleriffeqarpoq, tunisassiorfiup Ilulissaniittup saniatigut Sisimiuni Paamiunilu raajaleriffeqarami.

Kilisaatit raajarniutit raajanik qajuusaasiorsinnaanngimmata, qularutissaanngitsumik oqaatigineqarsinnaavoq, taamaallaat Ilulissani raajat mikivallaat tulaanneqartartut raajanik qajuusaariarineqartartut.

KNR-imiit Ilulissani Royal Greenlandip tunisassiorfiani ittuusumut, Allan Jensenimut, apeqqutigigatsigu tulaanneqartartut qassi procentia qajuusaarianeqartarnersoq, akivoq, raajat tulaanneqartartut 8-miit 10 procenti tikillugu qajuusaasiarineqartartut.

Qeqertarsuup Tunuani ukiumi sikoqartarnerata raajat aalisapilunneqarnissaat pinaveersimatittarpaa, taamaammallu Qeqertarsuup Tunua sinerissap kujataanut naleqqiullugu raajaginnerusutut oqaatigineqarsinnaavoq.

Taamaammat Ilulissani tulaassat 8-miit 10 procentiinut qajuusaasiarineqartartunut sanilliullugu kilisaatini avataasiutaasuni kiisalu Sisimiut Paamiullu eqqaanni raajanut pisarineqartartunut naleqqiussissagaanni eqqoriaruminarpoq taakkunannga amerlanerujussuit sinerissap sinnerani eqqaannarneqartarsimassasut.