Ilulissat kangia pillugu najoqqutassiaq nutaaq
Inuit sullissiviillu assigiinngitsorpassuit najoqqutassiap nutaap suliarineqarneranut peqataasimapput. Assersuutigalugu politiit sumiiffimmi isumannaallisaaneq pillugu pillugu paasissutissiisimapput katersugaasivillu aamma atuakkamut ilanngussaqarsimalluni.
-Ilimagisatsinnit annertunerungaatsiarpoq. Aallaqqaammut sumiiffik pillugu quppersakkamik suliarniarluta aalajangeraluarpugut, maannali tassa allarluinnarmik iluseqarluni saqqummerpoq. Sumiiffik pillugu najoqqutassaq takornarianit aammalu illoqarfimmiunit qangali apersuutigineqartalerpoq, najoqqutassiarlu pillugu uatsinnut apuunneqartut maannamut pitsaalluinnartuupput, UNESCO-mi site manageri Naja Habermann oqarpoq.
Ilulissani Kangia pillugu allaffiup najoqqutassiaa nunarsuarmi sumiiffiit alutornarnissaat ilaat pillugu najoqqutassiaavoq nutartigaq paasissutissiisorlu. 82-inik qupperneqarpoq qangalu pisarsimasut, uumasut naasullu allaaserineqarlutik aammalu Kangiani ingerlaarfissat nalunaaqutsersorsimasut pillugit nunap assiganik imaqarluni.
-Najoqqutassiaq suliniuterpassuatta piffissami sivisuumi piareersarsimasatta ilagaat. Qulimiguulinnut mittarfiusimasup eqqaani illumik pulaarfissamik sananiarluta suli anguniagaqarpugut, aamma Real Dania suliniummik aningaasalersueqataarusuttoq angusaqarfiulluartumik oqaloqatiginikuuarput. Pinngortitaq ajoqusiinngikkaluarluta takornariat sumiiffimmut piumasaqaataannik naammassisaqarniarluta pingaartittupilussuuarput, Naja Habermann knr.gl-imut oqarpoq.
Najoqqutassiaq Ilulissani akunnittarfinni takornariartitsiviillu allaffiini pisiarineqarsinnaavoq. Aamma qanittukkut www.greenlandtoday.com-imi pisiarineqarsinnaanngussaaq.
