Ilulissat kangerluat ulorianartorsiortunut ilaanngilaq
Naalagaaffiit peqatigiit ilinniartitaanermut, ilisimatusarnermut kulturimullu suleqatigiiffiata UNISCOp sapaatip akunnerata tulliani ataatsimeersuarnermini Nunarsuarmi kinguaariit kingornutassaattut eriagisassatut toqqarneqarsimasut nalilersussavai.
Manerassuarmi qeqertat Galapagos-ip qeqertai allanertanik qaqutigoortunillu uumasoqarfiusut aammalu Afrikami nuna eqqissisimatitaq Virunga Gorillat nungutaanissaminnut aallerinartorsiortinneqartut najugaqarfigisaat ulorianaartorsiortutut nalilerneqarput.
Nunarsuarmi kinguaariit kingornutassaattut eriagisassat pillugit ataatsimiititaliaq – World Heritage – juulip illuisa aappaanniit qulingata tungaanut Canada-p immmikkoortuani Quebec-imi ataatsimiissaaq,
kinguaariit kingornutassaattut eriagisaannik nunat assigiinngitsut paarsilluarnersut nalilersussallugit.
Nunarsuarmi kinguaariit kingornutassaattut eriagisassaattut toqqarneqarsimasut nunarsuarmi tamani 851iupput taakkunanngalu 30-it eriagisassatut inisissimajunnaarnissaat ernummassutigineqarpoq.
Danmarkimi eriagisassaatut toqqarsimasut tassaapput, Jelling-imi ujaqqat allatorfigineqarsimasut Rune Stenene aamma Roskilde-imi oqaluffissaarsuaq Roskilde Domkirke, kiisalu illussaarsuaq Kronborg.
Ilulissat eqqaani Ilulissat kangerluat nunarsuarmi eriagisassatut ukiut sisamat matuma siornatigut akuerisaavoq, taannali ulorianartorsiortut allattorsimaffiani ilaanngilaq.
