Ilulissat kangerluanit mayday
Aalisartut marluk Ilulissat kangerluani qulimiguulimmik S-61-imik annaanneqarnerinit sapaatip akunnera ataaseq qaangiutilaarpoq. Qulimiguulik S-61 atorlugu annaassiniaqqittoqarpoq, tamatumuuna aalisartoq inuunerminik navianartorsiorluni vhf radiokkut maydayimik nassitsisimalluni.
- Angut ningittakkaminik amooriartortilluni kangerlummi sikumik mattussaavoq angallataalu 21 fodsi sikkugussaalluni. Allatut ilioriarsinnaajunnaarami puttaamut niulluni angallatini qimaannartariaqarsimavaa, Ilulissat politiivini vicepolitikommisæri Karl Vinther KNR.gl-imut oqarpoq.
Aalisartup ajutuulersup ikiornissaanut periarfissat politiinit misissorneqarput, sikoqarpallaarneralu pissutigalugu Imiliup eqqaa tikinneqarsinnaanngitsoq paasineqarluni.
- S-61 Kangerlussuarmiittoq aggersarparput angullu ajunngitsoq qulimiguulimmut ikisinnaasimallutigu. Angut qujanartumik ajunngilaq, angallataali qanoq pisimanersoq ajoraluartumik naluarput, Karl Vinther oqarpoq.
Ilulissat kangerluat suliffigissallugu navianartuuvoq. Ukioq manna pingajussaanik annaassiniartoqarpoq. Aalisartoq Diskolinep angallataanit juulli sioqqullugu annaanneqarpoq aalisartullu marluk qulimiguulimmik S-61-imik sapaatip akunnerata ataaseq matuma siorna annaanneqarlutik.
