Ilulissat: Ikuallattunik paasiniaasartut aggersarneqarput
Qaartoortoqarnissaa allaat aarleqqutigineqaleraluarpoq poorskip ulluani Ilulissani ruujorilerisut suliffeqarfiat ikuallarujussuarmat. Ikuallannermut suna pissutaanersoq maannamut Ilulissani qatserisartut paasisinnaasimanngilaat.
- Taamaammat ikuallassimasunik paasiniaasartut Danmarkimeersut ikiortiserineqarput taakkulu paasiniaaneq sapaatip akunnerata tullianiik ingerlatilissavaat, avannaani politikommisæri Bo Borgnæs KNRimut taama oqarpoq.
Taassuma eqqoriarusunngilaa ikuallannermut suna pissutaasimasinnaanersoq suliassarlu immikkut ilisimasalinnut sapaatip akunnera tulleq Ilulissanut tikittussanut nangitassanngorlugu.
Ikuallanneq ima annertutigaaq Ilulissani qatserisartut mittarfiup qatserisartuinit ikiorneqartariaqarsimallutik arnarlu qatserisartoq aamma putsumik najuussuisimanini pillugu napparsimmavimmi nakkutigineqarallartariaqarsimalluni. Nalunaaquttap akunneri qulingiluat aatsaat qaangiuttut ikuallanneq qamippoq. Ikuallaffiup eqqaa 100 meterip iluani kikkunnit tamanit tikeqqusaajunnaaraluarpoq qaartoortoqarsinnaanera aarleqqutigineqalermat.
- Sullivik taanna ikuallassimaqimmat paasiniaruminaassimaaqaaq suna ikuallannermut pissutaanersoq. Taamaattumik pisariaqarsimasoq ikuallattoqarsimatillugu paasiniaasartunik Danmarkimiit tikisitsinissaq, Bo Borgnæs taama oqarpoq.
