- Nappaqqinneqarnissaa angorusulluinnarparput, World of Greenlandimi pisortaaneq Asger Køppen oqarpoq.Assi: World of Greenland

Ilulissat eqqaanni illu unnuisarfik sooq ikuallannersoq politiit suli paasinngikkaat

Ilulissat eqqaanni takornarianut illu unnuisarfik ornigarneqarluartoq nungulluni ikuallappoq. Politiit unnuisarfik taanna sooq ikuallannersoq suli paasinngilaat.

Iluliarmiut ilarpassui nunatsinni angutit inersimasut isikkamik arsaannermi pissartanngorniunneranni isiginnaaleruttorneranni pujoq qernertoq Ilulissani nunap timaani takussaavoq.

Takornariartitsiviup World of Greenlandip unnuisarfiutaa ”Igloo Lodge” ukiukkut takornarianit unnuiffigineqartartoq ikuallassimasoq kingorna paasineqarpoq.

Unnuisarfik taanna Ilulissaniit 12 kilometerinik ungasitsigisumiittoq aasakkut takornarianit unnuiffigineqartanngilaq. Taamaammat unnuisarfiup ikuallannera World of Greenlandimi pisortaanerup Asger Køppenip tupigaa:

- Taama pisoqarnera eqqumeeqaaq. Unnuisarfimmi sarfaqaranilu ikuallajasoqanngilaq, Asger Køppen KNR-imut oqarpoq.

 

Nunap timaani illup unnuisarfiup ikuallanneranit pujoq qernertoq Ilulissaniit ersarippoq.

 

Ilulissanilu politiit unnuisarfik taanna qanoq ikuallalersimanersoq nassuiarsinnaanngikkallarpaat:

- Uppernarsaataasinnaasunik katersuiartorluta unnuisarfimmeereerpugut, taakkualu qanorpiaq pisoqarsimaneranik paasiniaanitsinni iluaqutigerataannaavagut. Danmarkimilu politiit teknikeriisa ikiortiserinissaat pisariaqalersinnaavoq, Ilulissani politikommissæri Palu Eriksen oqarpoq.

Inunnillu unnuisarfiup ikuallannerani ajoqusertoqarsimanngitsoq, politiit aamma oqaatigaat.

Iluliarmiut takornariallu eqqugaassasut

Igloo Lodge ukialuinnarnik pisoqaassuseqaraluartoq ukioq kaajallallugu takornarialerisoqarsinnaaneranut iluaqutaaqalunilu pingaaruteqarsimaqaaq.

Taamaammat unnuisarfiup nungulluni ikuallannera ajuusaarutigeqaat:

- Unnuisarfiup ikuallannera ukiuunerani takornarialerinitsinnut ajoraluartumik kalluaassaaqaaq, unnuisarfimmi taanna ukioq kaajallallugu takornariaqartitsinermut pingaaruteqarmat. Unnuisarfimmi tassani taassumalu eqqaani illuaqqani siorna unnuisut 600-upput, taanna oqarpoq nangillunilu:

- Uagut kisitta eqqugaanngilagut, Ilulissanili takornarianik soorlu qimussimik, qamuteralannik umiatsiamillu angallassisartut aamma eqqugaassapput.

World of Greenlandip unnuisarfiutaani tassani ukiaru unnuisussaagaluanik takornariaqartussaavoq, taakkualu allami unnuiffissarsineqarsinnaanersut tikinnissaralualluunniit taamaatiinnarneqassanersoq misissorneqassaaq.

Asger Køppenip unnuisarfik taanna qanoq pineqassanersoq qularinngilaa:

- Nappaqqinneqarnissaa angorusulluinnarparput, taanna oqarpoq.

World of Greenland Nunatta Angalatitsivianit pigineqartoq, Air Greenlandip Namminersorlutik Oqartussanit pigineqartup suliffeqarfiutaasa ilagaat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl