Ilulissanut takornariat amerliartorput
Ilulissani takornariaqarneq aasaq manna kingumut aallartippoq ukiormannalu juuli ilanngullugu takornariat 10 procentimik amerleriaateqarnissaat ilimagineqarpoq.
Hotel Arctic-mi pisortaq, Erik Bjerregaard oqarpoq aasaanerani takornariartartut kisimik amerliartoratik aammali ukiukkut takornariartartut amerliartuinnartut.
- Ukiukkut takornariartartut februaarimit apriili tikillugu ingerlalluarsimaqaat aamma ukiut kingulliit marluk ingerlaneranni takornariartartut suli amerliartoraluartut ukiormanna takornariartut siornamut sanilliullugit amerlanerusimapput, Hotel Arctic-mi pisortaq, Erik Bjerregaard oqarpoq.
Ukiukkut takornariartartut 50 procentimit 100 procentimut amerleriarsimapput aasaq mannalu akunnittarfiutillit aamma allat malugilluarsimassajunnarsimavaat takornariat aasaq manna amerlanerusut, Erik Bjerregaard oqarpoq nangillunilu. Takornariartartut siorna julip qaammataani tikissimasut sanilliutissagaanni ukiormanna 10 procentit angullugit qaffariarsimapput taamaattumik takornariat ukiormanna amerlanerunissaat naatsorsuutigineqarsinnaavoq, Hotel Arctic-mi pisortaq oqarpoq.
Air Greenlandip, Greenland Tourismip aamma danmarkimi angalatitsiviit suleqatigiillutik nunarput pillugu nittarsaassilluarsimanerat piseqqusaaruteqarsimanerallu pissutigalugit takornariat amerliartortut oqaatigineqarpoq. Ilulissani akunnittarfimmi Hotel Hvide Falk-mi aamma takornariat unnuisartut amerliartorput. Hotel Hvide Falk-mi saaffiginnittarfimmi sulisoq, Karen Jakobsen oqarpoq, Akunnittarfik immikkut 19-nik nutaanik isikkigivilluartunik inissaqartitsitileraluartoq aasaq naallugu akunnittarfik ulikkaaqqasussanngortoq.
Nuna tamakkerlugu takornariat siorna unnuisimasut katillugit 68.400-iusimapput.
Hotel Arctic-mi pisortaq, Erik Bjerregaard aamma oqarpoq takornariat tikittartut qallunaat nunaanneersuunerusaraluarlutik tyskit, tuluit amerikamiullu takornariat amerliartortut.
