Ilulissani unnugu nuannannersuaqalerpoq
![](/sites/default/files/styles/image_934x467/public/article_images/ilulissat_4.jpg?itok=FSwKvDhN)
Ilulissani nuannanneq siunertaqarpoq, siunertaraalu Ilulissani ivigaasanik arsaattarfiliornissamut katersinissaq.
- Ukiut kingulliit pingasut maani Ilulissani havnefestimi arsaattarfittaarnissamut aningaasanut katersuiniarnermut atatillugu aaqqissuisarpugut taanna tassa unnugu maani Ilulissani pissasoq nipilersortitsilluta.
Umiarsualivimmi nuannannissamut ivigaasanillu arsaattarfiliornissamut katersuiniarnermut aaqqissuisoq Knud Fleischer taama oqarpoq.
Ivingaasanik arsaattarfiliornissamut aningaasat 250.000 koruunit titartaasitsinermut atorneqartussatut naatsorsuutigineqartut taassuma aamma oqaluttuaraa.
Nipilersortartut tusaamaneqarluartut appisimaassapput
Unnugu nalunaaqutaq qulingiluanut umiarsualivimmi nuannanneq aallartippat nipilersortussarpassuaqassaaq.
- Tassani nipilersorlutik siulliullutik aallartissapput Sikukkut, qanga Iluliarmiut nipilersortartorsuit tusaamasanngoriartuinnartut, tulliullutik Disko Bay Bluesikkut aamma tusaamasaasut tamanit kingulliullutillu appissapput Unnuaq Band.
Umiarsualivimmi nuannatsitsinissamut aaqqissuisoq taama oqarpoq.
Unnuup ingerlanerani aamma oqalugiartoqassaaq, tassanilu Knud Fleischer DBU-minngaanneersorlu Svend Pedersen ivigaasanik arsaattarfeqalernissaq pillugu oqalugiassallutik.
DBU-mit aggertoqassaaq
Knud Fleischer aningaasaliisartunik assigiinngitsunik Qallunaat Nunaanneersunit oqaloqateqarsimavoq, arlaasalu ivigaasanik arsaattarfissaq tapersersorsinnaassavaat, taamaammat Knud Flescheri unnugu aggertoqarluarnissaa neriuutigaa.
- Neriuppugut assorujussuaq aaqqissuisut inuppassuillu havnefestimut takkussuukkumaartut, nuannaaqatigaluta qilanaaqatigalutalu. Taamaaliorutta ukialunnguit qaangiuppata Ilulissani arsaattarfissaarsuaq pilerpat tamatta ammaanersioqataaffigissuarput, Knud Flescher KNR-imut taama oqarpoq.
Iserneq unnugu 50 kr-neqassaaq aaqqissuussinerly nalunaaqutaq qulingiluanit unnuakkut marlup tungaanut pissaaq.