Ilulissani aalisartut angallatiminnik umiarsualivimmi tattorliupput.
Umiarsualiviup nutarternissaa, aalisartullu talittarfissaannik pilersaarummik Namminersornerullutik Oqartussat saqqummiusseqqammerput, piaarnerpaamik suliarineqarnissaa siunertaralugu.
Ilulissani umiarsualiviup pisortaata, Karl Geislerip, neriuutigaa, ukiut pingasut-sisamat qaangiutsinnagit piviusunngornissaa. Karl Geislerip ilimagaa, Nuummi umiarsualivissaq siulliunneqassasoq, kissaatigaalu Ilulissat tulliunneqarnissaat – Sisimiut salliutinneqanngippata.
Umiarsualiviit sorliit siulliunneqassanersut inatsisartut ukiaru ataatsimiilerunik aalajangissavaat. Pilersaarummi Ilulissat ilaatinneqanngikkaluarput, januaarimili aalajangerneqarpoq Ilulissat Uummannarlu umiarsualivigissarneqassasut.