Ilulissani tusaamasassarsiulerput
Erinarsornermik unammisitsineq "Unnuk ataaseq tusaamasaaneq" Ilulissani kulturip illorsuani Sermermiuni ingerlanneqassaaq arfininngorneq februarip 19-iat. Meeqqat inuusuttullu siunissamut neriulluartut peqataaniarlutik nalunaarput nipilersortulerlutik tusarnaariat saallugit erinarsussallutik.
Unnuk taanna aaqqissuinermi nipilersortuusut ingiortigalugit erinarsussapput ataasinngornermilu unnukkut sungiusarnertik aallartissavaat.
- Peqataasut erinarsugassartik toqqaaqataaffigaat. Tassani aamma takusinnaalerparput ullutsinni erinarsuutit sorliit meeqqat inuusuttullu nuannarineruneraat, taama KNR-imut oqarpoq kulturip illorsuani Sermermiuni aaqqissuinermut pisortaagallartoq Randi Broberg.
- Erinarsorumaneqarnerpaatut taasinnaavagut "Uummat"-ikkut, Ninap minnerunngitsumillu "Sussat" atugaat, taama Randi Broberg oqarpoq.
Peqataasut marlunnut avinneqarput arlaat arfinilinniit aqqaneq marluk tikillugit ukioqarlutik taakkunanilu erinarsoqatigiit 13-iupput. Taakku erinarsuut siulleq atoreerunikku finalemi tallimaannanngorsimassapput. Angajulliumaallu 13-iniit 17-it tikillugit ukiullit akornanni erinarsoqatigiit tallimaapput taakku finale-mi pingasuinnanngussapput.
Ajugaasut nassaariniarneranni dommerit pingasut naliliisuussapput. Taakku tassaapput erinarsortartoq Kristine Thomsen ukiormanna X-factorimi peqataasoq ajoraluartumilli toqqaannartumik aallakaatitsinernut anngunnani. Aappaat tassaavoq Marie Mathiassen erinarsortartuullunilu isiginnaartitsisartoq. Kiisalu angutitaat Miki Olsen nipilersornermik ilinniarfimmeersuuvoq.
- Isumaqatigiinnikuuvugut dommerit oqaaserisaat X-factorimi Blachmannikkutut sakkortutigissanngitsut, taakkulu oqaasii tusarnaarianit tusaaneqarsinnaajumaarput, taama Randi Broberg oqarpoq.