Royal Greenland Ilulissani tunisassiorfiup matugallarnissaa taamaatiinnarneqarpoq
Qeqertarsuup Tunuani sikuermat raajarniat taavani aalisaqqilerput, raajarniallu Ilulissani Royal Greenlandip raajanik tunisassiorfianut tunisisarmata, raajanik tunisassiorfimmi atortorissaarutinik aserfallatssaaliisoqarnissaa pissutigalugu sapaatip akunnerani 12-imi matusigallarnissamik pilersaarut taamaatiinnarneqarpoq.
- Maanna raajarniutit tallimat Ilulissani Royal Greenlandip raajanik tunisassiorfianut tunisisarmata uge 12-imi matusigallarnissamik pilersaaruteqarnerput unitsinnaarparput. Tassalu sapaatip akunnerani 12-imi raajarniat tunisiinnarsinnaassapput taamatullu sulisuvut suliinnarlutik, Ilulissani Royal Greenlandip raajaleriffiani tunisassiornermi aqutsisoq Jensigne Schmidt taama oqarpoq.
Raajarniutit sumiiffinni allani raajarnialersimagaluarlutik maanna Qeqertarsuup Tunuani raajarniaqqilerlutik Ilulissani Royal Greenlandip tunisassiorfianut sapaatip akunnerata siulianili tuniseqittalersimasut, Jensigne Schmidtip oqaatigaa.
- Sila allanngormat naleqqussarfigaarput. Taamaattumik kingusinnerusukkut sapaatip akunnerata naanerani sulinngiffeqarallarneq sivitsorlugu raajanik tunisassiorfimmi atortorissaarutinik aserfallatssaaliisoqarnissaa ingerlanneqarumaartoq aalajangiupparput, Jensigne Schmidt oqarpoq.
