Ilulissani tillinniat inuusuttut sisamat tigusarineqarput
Inuusuttut sukisaarsaarfianni Naapiffimmi aningaasat 10.000 koruunit tillinneqarput kiisalu meeqqerivimmi atortorissaarutit assiginngitsut tillinneqarlutik. Inuusuttut tillinniat sisamasut ilaat ippassaq ullup qeqqalernerani tigusarineqarpoq, ualiartulerneranilu sinneri politiinit tigusarineqarlutik.
- Tillinniat sisamat tamarmik tillinniarnitik pillugit nassuerput, Ilulissani Politiit ittuat Preben Markvardsen oqarpoq. Tillinniat pingasut siornatigut pinerluuteqanngisaannarmata maanna iperangaareerput. Ataaserlu maanna eqqartuussivimmi inatsit tunngaviusoq naapertorlugu killisiorneqarpoq, taanna siornatigut allamik pinerluuteqartareersoq Preben Markvardsen oqarpoq. Aningaasat tillinneqartut 10.000 koruunit sivikitsuinnarmi atorneqapallassimammata sinneruttut politiit arsaarinnissutigivaat, taakkualu 4.000 koruuniupput.
Taassumap saniatigut qivittumik tigutikkalluartoq pillugu suliamut tunngatillugu Ilulissani Politiit ilisimannittunit kiisalu takunnissimasinnaasunit saaffigineqarsimanngillat.
- Qivittoq pillugu oqallittoqartoq ilisimavarput, tunngavissaqarsinnaasunilli saaffiginnissutinik suli tusagaqanngilagut, innuttaasut suliamut tunngatillugu iluaqutaasinnaasumik oqaasissaqarunik Ilulissani politiinut saaffiginninnissaat kissaatigaarput, Preben Markvardsen oqarpoq.
