Ilulissani tillinniarnerpassuit

Aningaasat pigisallu tuniniaqqinneqarsinnaasut. Ilulissani suliffeqarfinnut aserorterilluni tillinniarnissaq siunertaralugu isersimanerit arlallit politiinut ulluni makkunani nalunaarutigiortorneqarput.
Allattoq Najaaraq Egede
septembarip 13-at 2010 10:31

Ilulissani politeeqarfiup pisortaa, Kasper Berthelsen, taama ilisimatitsivoq.

- Tillinniarnerit qulit piffissami kingullermi nalunaarutigineqarput. Naluarput kikkut kuupeeq atorlugu matut igalaalluunniit aserorlugit suliffeqarfinnut iserlutik tillinniaqattaarnersut. Aningaasat allallu tuniniaruminarnerit pillugit tillinniartarsimagunarput, oqarpoq.

Sunngiffimmi ornittagaq Naapiffik pingasoriarluni tillinniarfigineqarpoq, kioskiata aningaasaatai tamarmik tiguneqartarsimallutik. Allakkerisarfimmi aamma mobiilinik arlalinnik tillinniartoqarsimavoq, maannamut qanoq naleqartiginersut oqaatigineqarsinnaanngilaq.

Jysk Sengetøjslagerimi tillinniartoqarnerani karsimiittuutit 25.831 koruunit tillinneqarsimapput. Allat matutik igalaatilluunniit aserorlugit iserfigineqarsimasut tammaasaqannginnerarput, allalli tammaasaat tassaapput fjernsyni aamma qarasaasiat teriaat.

Ilulissani politiit tamaviaarlutik kikkut tillinniartuunersut paasiniaraat, Kasper Berthelsenip ilanngullugu oqaatigaa.