Ilulissani Specialcenteri 2010-mi inissanik amigaateqalissaaq

Ilulissani Specialcenteri innarluutilinnik aqqanilinnik atuartulik ukioq naappat inissiffissaarutissaaq. Atuartut innarluutillit massakkut quersuarmi attartukkami ukioq 2010-ip aallartinnerata tungaanut inissisimapput.
Allattoq Lotte Holm
januaarip 29-at 2009 13:23

Atuarfik Mathias Storch nutarterniarneqaleruttorpoq titartakkallu qangali saqqummiunneqareerlutik. Tamanna qujagineqaqaaq, pilersaatutilli ilaannakuupput. Atuarfiup nuterterneqarnissaanut Innarluutillit Atuarfiat aallaqqaataaniilli titartagartaani ersissimanngilaq, massakkulli titakkani ilaalersimagaluarpoq kisiannili aningaasalerneqarnikuunani.

- Tamanna pisariaqartitsisut amerliartornerannut naapertuutinngilaq, Specialskolep pisortaa Arnaruluk Pedersen oqarpoq nangilluni:

- Soorunami toqqissisimanngilaq aamma naatsorsuutigaarput augustimiit 15-it tikillugit atuartuuteqalersinnaanerput. Taamaakkaluartoq ukiuni kingullerni qulinngiluani Ilulissat kommuneata innarluutillit atuarfeqarnerat akilersugarinikuuvaa. Naak, inatsit malillugu meeqqat atuarfeqarnissaat Namminersornerullutik Oqartussat isumagisassarigaluaraat.

Massakkullu tassa Atuarfik Mathias Storchip allilerneqarnissaanut iluarsaanneqarnissaannullu atatillugu innarluutillit atuarfiata atuarfimmut atalernissaa aningaasaliiffigineqarsimanngilaq, Specialskolep pisortaa Arnaruluk Pedersen oqarpoq.