Ilulissani Siumut Kattusseqatigiillu partiiat suleqatigiilerput

- Siumup Kattusseqatigiillu Partiiata pingaartippaat, suleqatigiinneq akaareqatigiilluni ataqqeqatigiillunilu ingerlanneqassasoq, innuttaasut pitsaasumik sullinneqarnissaat anguniarlugu, suleqatigiilersut allapput.

Suleqatigiilersut 15-inik immikkoortulimmik isumaqatigiissusiorput.

Ilaatigut nunaqarfiit piorsarnerinut aningaasaliissutit nalilersoqqinneqarnissaat, neqitsersuisarfiup ammerivissalu aasamut suliarineqarnissaat aamma kulturimut kiisalu meeqqanut inuusuttunullu suliniutit nukittorsarneqarnissaat isumaqatigiissutigineqarpoq.

Aamma utoqqaat siusinaarlutillu sulisinnaajunnaarnersiutillit ukiukkut tamakkiisumik kiassarnermut taperneqartarnerisa attatiinnarneqarnissaa isumaqatigiissutigineqarpoq.

Kiassarnermut tapit komunalbestyrelsep tamarmiusup novembarip 22-anni 35 procentimik apparpai.

Kattusseqatigiit Partiiat borgmestereqartitsipput, kisianni 2005-imi Inuit Ataqatigiinnit suleqateqarunnaaramilli ikinnerussuteqalerput. Illuatungaatigut Siumut Inuit Ataqatigiinnik 2005-imili suleqateqarnermikkut amerlanerusuteqarlutik kommunip ineriartornissanut sunniuteqarnissamut periarfissaqarluarsimapput.