Ilulissani sermeqarfik takornarianit ornigarneqarluartartoq UNESCO-llu kingornutassanut allattorsimaffiutaanut ukioq 2004-mi ilanngutsinneqartoq eqqisisimanerulersinneqartussanngorpoq.
Sermermiut eqqissisimatitaasup suli eqqisisimanerulersinneqarnissaa Naalakkersuisut aalajangerpaat tamannalu juulip aallaqqaataani tassa sapaatiummalli atuutilerpoq.
Eqqissisimanerulersitsinermi malittarisassat sukannernerulerput, nuna eriagisassallu aserfallatsaaliniarlugit Sermermiuni aqqutissiat avataasigut ukiut tamaasa apriilip aallaqqaataaniit oktobarip 31-at ilanngullugu ingerlasoqartarunnaassaaq.
Sermermiut sissaannut angallatit aamma tulaqqusaajunnaarput, angallatinut ilaallutik Sermermiunut pisartut nuna aserfallatsilermassuk.
Aamma umiarsuit 1.000 GRT-nit aningerusut Sermermiunut pulaqqusaajunnaarput.