Ilulissani sanaartortitsineq isorineqarpoq
Ilulissani sanaartornermik suliaqartut, qaammatialunnguit matuma siornagut 200-t missaaniissimasut, maanna 60-it missaaniiginnalersimapput.
Namminersorlutik Oqartussat illuliassatut pilersaarutaat 24-t sivisussusiligaanngitsumik aamma unitsinneqarsimapput.
Ilaatigut tamakku pillugit Demokraatit Folketingimut qineqqusaartitaat, Ane Lone Bagger, isornartorsiuilerpoq. Illussanik sanaartornerup kinguartinneqarnera pillugu taanna oqarpoq Ilulissani inuussutissarsiortunut tamanna kalluaasussaassaqisoq.
Ane Lone Baggerip paasiuminaatsippaa, Sisimiuni illuliassat suliariumannittussarsiuunneranni itigartitsinerit tunngavigalugit Ilulissani illuliassat, Sisimiuni illuliassat assingi, kinguartinneqarsimammata atamigooq suliariumannittussarsiuussinermi akuersinissaq utaqqeqqaarneqassammat.
Kisianni Namminersorlutik Oqartussat aalajangersimapput, Ilulissani, Sisimiuni Qaqortumilu illussanik sanaartugassat ataatsimoorullugit suliariumannittussarsiuunneqassasut.
Namminersorlutik Oqartussaniit oqarput illoqarfinni taakkunani illussat suliarineqartussat qanittukkut aallartinneqassasut. Oqaatigineqanngilarli "qanittukkut"-mik oqarneq qaquguussanersoq.
- Utaqqisinneqarnissarput kusanaappoq akuerineqarsinnaananilu, Ane Lone Bagger oqarpoq.
Tamatumunnga tunngatillugu Jens B. Frederiksen oqaaseqartinniarsimagaluarparput, iluatsinnaguli. Kunngikkormiut nunatsinni tikeraarneranni Kujataani angalaqataasunut ulluni makkunani taanna ilaavoq.
Jens B. Frederiksen kingusinnerusukkut immaqa oqaaseqartissinnaassavarput, soorlumi Dronningip siuaasaasa ilaat, Valdemar Atterdag, oqartoq, ulloq alla aqagu nalliukkumaarpoq.
