Ilulissani raajaleriffiup matuneqarnissaanut aalisartut naammagittaalliorput

Royal Greenlandip Ilulissani raajaleriffik ukiuunerani matunialerpaa. Februaarip aallaqqaataaniit maajip aallaqqaataata tungaanut matoqqatissavaa. Matoqqaneratalu nalaani aalisartut Sisimiunut Paamiunullu tunisisarnissaat innersuussutigaat – tamannalu aalisartunit naammaginngilluinnarpaat:

Suliffissuarmi pisortaq Niels Bjerregård naapertorlugu ukiuunerani tunisassiarineqartartut ikilivallaaqimmata raajaleriffik qaammatini pingasuni matugallarneqartussaavoq. Tamannali tunngavilersuutigineqartoq Ilulissani aalisartunit akuerineqarsinnaanngilaq.

- Sikoqanngimmat raajarniarfigissaarpugut. Royal Greenlandip ikinnerusunik tunisisalernerarluta oqalunnera eqqunngilluinnarpoq. Raajarpassuaqarpoq, Ilulissani raajarniutaatillit peqatigiiffianni siulittaasoq Jerimias Jensen taama oqarpoq.

Ukiuunerani matoqqasoqarnissaanik kalerriisoqarsimannginnera peqatigiiffimmit kamaatigineqarpoq.

- Nalaatsornerinnarmik umiarsualivimmiillunga ippassaq matunissaq tusarpara. Aatsaat taamatut pisoqalinngilaq, tamannalu akuerineqarsinnaanngilaq, siulittaasoq oqarpoq.

Raajarniutillit peqatigiiffiat, aqqaneq-marlunnik ilaasortalik borgmesterilu Anthon Frederiksen, peqatigiillutik Royal Greenlandimut, aalisartut piniartullu kattuffiannut, KNAPK-mut kommuneqarfiup kattuffianut, KANUKOKA-mut kiisalu aalisarnermut piniarnermullu pisortaqarfimmut naammagittaalliorput.

- Uagut raajarniartuusugut nunami suliffissanik amerlanerpaanik pilersitsisarpugut. Sisimiunut Paamiunulluunniit kujavarluta tunisiartorusunngilagut. Aasianni suliffissuaq matummat oqarfigineqarpugut Ilulissanut tunisisinnaassasugut. Taamatut tunoqqutsiniarneq aalisartunik mitallerneruvoq, Jerimias Jensen taama oqarpoq.

Ilulissani raajaleriffiup ukiuunerani matoqqanerata nalaani soraarsitsisoqassanngilaq. Qaleralinnik tunisassiorneq Qasigiannguanut nuunneqarsimagaluartoq Ilulissanut uterteqqissinnarlugu aallartinneqassaaq.

Royal Greenlandimit oqaaseqartitsiniaraluaratta iluatitsinngilagut