Ilulissani qimminut nerukkaatissanik nunguutsisoortut
Uumasut nakorsaat Sanne Eline Wennerberg innuttaasunit ernumasunit saaffigineqarsimavoq, naak qimmit ukiuunerani nerukkaatissanik panertunik 5-600 gramminik ullormut nerukkaatissanut taartissanik allanik pissarsigallartoqarsimagaluartoq.
- Amerlasuupilussuit maannakkorpiaq aalisartarput, taamaammat qimmit qaleralinnik nerukkarneqarsinnaalluarput. Aamma qimmiutillit ilaat aalisakkanik panertunik peqqumaateqarput. Taamaammat kingunipilorisinnaasaanik suli takunngilanga, aamma qimminik nerukkaatissaaleqineq pissutigalugu eqqugaasimasunik suli siumugaqanngilanga.
- Kangerluulli iluani sikoqarnerata allanngoriartaarsinnaaneraernumassutigaara, taamaalisoqassappammi aalisarsinnaaneq ajornakusuulissammat. Qujanartumilli aalisariartoqarsinnaavoq, qimmiutilippassuilli aamma ilaqarput aalisariarsinnaanngitsunik, taakkulu qimminut nerukkaatissanik pisiassaqarnissartik pisariaqartilluinnarpaat, Sanne Eline Wennerberg KNR-imut taama oqarpoq.
Aamma atuaruk Qimmit perlertut 19-it Ilulissani toqunneqartut
Nerukkaatissaqanngippata toqutsittariaqassapput
Uumasut nakorsaata nerukkaatissaaleqinerup kingunerisaanik qimminik nerukkaanngitsoortoqannginnissaa neriuutigaa, soorlu aasaanerani taamatut pisoqartartoq.
- Maannakkorpiaq sapinngisarput tamaat ikioqatigiittariaqarpugut, qimminulli nerukkaatissanik panertunut taartissanik pissarsiassaqanngivissorpat ataasiinnarmik iliortoqarsinnaasoq oqaatigaa.
- Qimmeqaraanni nerukkaatissaqartinnagillu taava allamik qinigassaqanngilaq. Qimmit nerukkaatissarsisinnaanngikkaanni kisianni toqutsiinnarlugit, qimmimmi nerukkanngitsuuinnarneqarsinnaanngillat, uumasut nakorsaat Sanne Eline Wennerberg taama oqarpoq.
Ilulissani qimminut nerukkaatissanik panertunik kingullermik ukiut 15-it matuma siorna nunguutsisoortoqarpoq. Niuertarfiit Centermarked aamma Pisiffik naapertorlugit, umiarsuaq tikittussaq tulleq nerukkaatissanik nassataqassaaq, qanorli annertutigisunik nassassanersoq apeqqutaaginnarpoq.