Ilulissani qalerallerinerup septemberimi aallarteqqinnissaa kinguartinneqarpoq
Qeqertarsuup Tunuani qaleralittanik Ilulissani suliareqqiineq upernaaq maajimi Qasigiannguanut nuunneqarpoq, Ilulissani qalerallerisussanik sulisoqarniarnikkut ajornartorsiortoqarmat.
Ilulissani qalerallerinerup septembarimi aallarteqqinnissaanik pilersaarut kinguartinneqarpoq.
Royal Greenlandip pisortaanerata tullia, Henrik Leth, ilisimatitsivoq, qalerallerineq Qasigiannguani ingerlaannarallassasoq, Ilulissani sulisussaqarniarnerup ajornartorsiutaajunnaarnissaata tungaanut.
Qalerallerinerup Ilulissani aallarteqqinnissaa suliffeqarfissuup ukiap ingerlanerani naliliiffigissagaa Henrik Leth ilisimatitsivoq.
- Ilulissani qalerallerinerup Qasigiannguanut nuukkallarneqarnera ingerlaannarallassaaq, taama aaqqiigallarneq maannamut iluatsilluartumik ingerlammat, Henrik Leth raadioaviisimut taama oqarpoq.