Ilulissani qaleralinniat ataatsimiissapput

Qeqertarsuup Tunuani qalerallit pisarineqartartut, maanna 8.800 tonsiusut, ikilerijussuarneqartariaqartut, pinngortitaleriffimmiit ippassaq oqaaatigineqarpoq. Qeqertarsuup tunuani qaleralinniat piffissami qaninnermi aaqqiissutissarsiorlutik ataatsimiissapput.

Qeqetarsuup Tunuani qaleralittassat ikilerujussuarnissaannik Pinngortitaleriffimmiit inassut. Ilulissani aalisartunit tupaallaatigineqanngilaq.

- Qalerallit ikiligaluttuinnarnerat ukiut tamaasa malugisarparput. Qalerallit Davisstrædemut sulliartortartut lulissat kangerluanut ukiukkut utertartut angisuut akunnattullu akuttusoorujussuanngornikuugamik, isumaqarpugullu tamanan peqqutaaqataasoq. Tassami qalerallit pisarineqartartut mikisuararsuupput, taamaammallu qassusertorpiassaarnikuuvoq, Ilulissani aalisartut piniartullu peqatigiiffiani siulittaasoq Ove Rosbach oqarpoq.

Taanna oqarpoq, Qeqertarsuup Tunuani qaleralinniat piffissami qaninnermi isumasioqatigiinniartut, aalisarnerup qanoq aaqqissuunnissaa oqaluuseralugu.

Kisianni qaleralinniarnermut akuersissutaatillit ikinnerulertariaqartut Ilulissani aalisartut aaqqiissutissatut oqaluuserisarpaat. Allamilli inuussutissarsiuteqalernissaat Naalakkersuisunit qulakkeerneqartariaqartoq, Ove Rosbach, oqarpoq.

- Qaleralinniarnermut akuersissutaatillit Ilulissani nunaqarfiini amerlasuupilorujussuupput. Aalisartunik eqquinissaq soorunani pinaveersaartussaavarput, Naalakkersuisullu arlaatigut aaqqissuussinngippata, aalisarnermik inuussutissarsiutillit ullumikkut allamik saariarfissaqanngilat,

Ilulissani aalisasartut piniartullu peqatigiiffianni siulittaasoq, Ove Rosbach, taama oqarpoq.