Ilulissani politiit takunnissimasinnaasumik ilisimannittumilluunniit suli oqaloqatissarsiorput.Assi: Christine Hyldal/ KNR

Ilulissani politiit ippassaq tigusarinnipput kingunitsianngualu iperaqqillugu

Ilulissani taxartartoq arfininngormat angutinit marlunnik ujajaaffigineqarpoq. Maanna angut ataaseq tusarniaaffigineqareerluni unnerluutigineqarpoq.

Ilulissani taxartartoq angutinit marlunnik arfininngormat ujajaaffigineqarpoq.

Angutit taxartitsisoq aningaasaataanik arsaarniarlugu qunusaarpaat, tamatumalu kingorna Ilulissani Nammaarfimmut qimaallutik.

Tassunga tunngatillugu angut ippassaq unnukkut arfineq pingasunngulersoq tigusarineqarpoq. Akunnerli ataatsip missaa qaangiummat iparagaaqqilluni.

AAMMA ATUARUK Politiet efterlyser stadig vidner til røveri i Ilulissat

Ilulissani politeeqarfimmi pisortaq KNR-imut taama ilisimatitsivoq.

- Angut tigusaraarput. Apersoreeratsiguli iparaqqipparput, taanna oqarpoq.

Angut 30-t sinnerlugit ukiulik unnerluutigineqarpoq.

Ujajaasoqarnerata kingorna angutit marluk politiinit ujaarineqartut ima allaaserineqarput:

Angutip aappaa 30-t 35-llu tungaanut ukioqarpoq kalaallisut isikkoqarluni. Taanna 165 centimerit missaanni angissuseqarpoq saluttuusinnaavoq aamma nalinginnaasumik timaa iluseqarluni. Taanna qernertumik nasaqarpoq taartumillu qalipaatilimmik jakkeqarluni. 

Angutip aappaa aamma kalaallisut isikkoqarpoq 30-t ataallugit ukioqarpasippoq, taannalu tungujortumik qalipaatilimmik jakkeqarpoq.

Suliamut atatillugu paasissutissaateqaruit Politiit Pingaartuisa oqarasuaataannut oqarasuaammut +299 70 14 48 sianersinnaavutit.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl