Ilulissani Piareersarfimmi atuartut silarsuaat annertusarneqarpoq
Kitaani Ilulissat takornariarfissuuvoq. Aalisartut piniartullu namminneq soqutigisartik aallaavigalugu isiginnittaaseqarput, takornariat nunamik minguilluinnartumik takunninniarlutik takkuttartut. Oqimaaqatigiissaarinissamut illuatungeriit imminnut paaseqatigiinnerulernissaat anguniagassaavoq. Ilulissani asilerisup illuatungeriit naapisinniarsarai.
Ilulissani Piareersarfimmi atuartut assigiinngitsunik kinaassusilerlutik isiginnaartitsipput. Atuartut ilaat takornariaasut, ilaat aalisartuupput ilaallu politikeriullutik.
Katrine Noahsen Gundel sammisartik pillugu ima nassuiaateqarpoq:
- Asilerisumuna Naja Habermannip ippassaminngaaniit pulaaramisigut nunamut pisuttuartinniarluta paasisassarsiortinniarluta. Nunap pissusaa taavalu Iluliarsuit eriagisassatut taakku aamma paasititsiniaaffigivagut, Katrine Noahsen Gundel oqaluttuarpoq.
Ilulissanimi takornariat amerligaluttuinnarput, takorusunneqarnerpaarlu tassaavoq Kangia Iluliarsuit aniaffiat.
Taamaammat asilerisup Naja Habermannip Piareersarfimmi atuartut ilaat pinngortitamoqatigai atuartut ”kinaasuusaarnerat attatiinnarlugu” pisuttuartillugit.
Taamatut aallutaqartitsinermigut Naja Habermannimmita suna anguniarpaa?
Ima oqarpoq: -Suut tamarmik qanoq imminnut ataqatigiitsiginersut paasitikkusussimavara, pinngortitarmi misigissagaanni ataasiinnarmik periuseqartoqarneq ajorpoq, pinngortitamik takunninnissatsinni ilimagisavut assiginngittaqimmata, soorlu takornariat pinngortitamik minguilluinnartumik takorusuttut, piniartut uumasunik takorusunnerusarput.
