Ilulissani nutaamik suliffissualiulerput

Halibut Greenland, tassaavoq piginneqatigiiffik nutaaq Ilulissani pilersinneqarnikuusoq. Ukiup kingulliup ingerlanerani piareersarneqarsimasoq, maannakkullu piviusunngoqqajaalersoq.

Siulersuisuni siulittaasoq Shahriyar Bordbar aperaarput tunisassiorfissap suut tunisassiariniarnerai imalu akivoq:

Aalisakkanut tunisassiorfissami qalerallit pingaarnertut tunisassiarineqassapput, ingammik japan cut-it suliarineqassallutik, aammali aalisakkat qeritiinnarneqartassapput Danmarkimut Europallu sinneranut tunisassiarineqarsinnaassallutik, immaqalumi ungasinnerusumut allaat tunineqartarsinnaassallutik. Qalerallilli saniatigut aamma saarulliit, suluppaakkat, qeeqqallu tunisassiarineqarsinnaasassapput.

Halibut Greenlandip siulersuisuini siulittaasup suli mianersuutigaa oqaatigissallugu qaqugu tunisassiorfissaq naammassineqarsinnaassanersoq, tassa Namminersornerullutik Oqartussaniit avatangiisinut tunngatillugu akuersissummik tunineqarnikuunnginnamik, taannalu pissarsiaritinnagu sanaartornissamut akuersissut pissarsiarineqarsinnaanngilaq.

Toqqavissamilli pissarsisoqareerpoq sinnerilu aamma piareersimasut Shahriyar Bordbar oqarpoq. Taakkua pissarsiareriarutsigit sanaartorneq tunisassiulernissarlu piviusunngorteriaannaassavarput, erseqqissaavoq.

Royal Greenlandip akinnguani tunisassiorfiliornermigut Royal Greenlandimut unammillerniarlernerlutik?

Shahriyar Bordbar:

Royal Greenland suliffissuarujussuummat unammillernianngivipparput, aalisartulli ilaat tunisassiorfissamut aningaasaleeqataanermikkut aalisakkanik tunisisarnissartik qulakkeernikuuvaat, taamaammat toqqaannartumik Royal Greenlandimut unammillertutut isiginngilagut, Shahriyar Bordbar oqarpoq.

Tunisassiorfissaraluaq alla nunap iluani inissitaq aalisartunit piviusunngorsinnaajunnaartutut isigineqarpoq.