Ilulissani ikuallaavimmi inuup timaata ilai marluk nassaarineqareersullu eqqakkanik misissuinermi qatserisartut politiinut ikiuupput.Assi: Kathrine Kruse / KNR

Ilulissani misissuinermi timimik ilivitsumik nassaarnissamik neriuuteqarneq annikilliartortoq

Ilulissani ikuallaavimmi eqqakkat tamarmik misissornissaannut politiit qatserisartullu amigaatigisaat annikitsunnguupput. Timip ilaanik allanik nassaartoqaqqinngitsoq, misissueqqissaarnermi aqutsisup oqaatigaa.

Ilulissani ikuallaavimmi amiilaarnartumik sapaatip akunnera ataaseq sinnerlugu matuma siorna nassaartoqarpoq. Siullermik timip ilaanik nassaartoqarpoq, kingornalu allamik eqqakkat akornanni nassaartoqaqqilluni.

Politiit qatserisartullu timimik ilivitsumik nassaarnissamik neriuuteqarlutik eqqakkat tamarmik misissoqqissaarpaat, eqqakkalli misissorneqartut nungukkiartuinnarneranni neriuut annikilliartuinnarpoq.

Politiit misissueeqissaarnermi aqutsisuat, Jan Lambertsen oqarpoq.

- Allanik (timip ilaanik aaqq.) nassaanngilagut, allanillu nassaarnissamik neriuuteqarneq ajoraluartumik annikilliartorpoq. Ikuallaavimmili eqqakkanik suli misissugassaqalaarpoq, taaallat suli neriuutissaqalaarpugut, taanna oqarpoq.

AAMMA ATUARUK Politiit: Pinerluuteqarsimasup iliuuseqaqqinnissaa Iluliarmiut annilaangagisariaqanngilaat

Pinerluttoqarsimaneranik toqusumillu misissuisartut toqutaasup qanoq toqusimanera paasisimagaat politiit tallimanngormat nalunaarutigaat.

Aamma toqutaasoq aqqa qulakkiingajassimavaat. Tamannali tamanut suli saqqummiunneqanngilaq.

Marluk tigummigallarneqartut – ataaserlu iperagaasoq

Misissuinermili ullormi tassani iluatsittumik paasineqartumi tamanna kisimiinngilaq. Inuit pingasut tigusarineqarsimasut politiit ulloq taanna ualikkut nalunaaruteqarput.

Tigusarineqartunit ataaseq aqaguani iperagaaqqippoq, marlullu eqqartuussivimmi matoqqasumik sassartinneqarlutik.

Eqqartuussivimmi sassartinneqarnerisa kingorna angut sapaatini akunnerni sisamani arnarlu ulluni pingasuni tigummigallagassanngortinneqarput. Arnarli ippassaq iperagaavoq.

AAMMA ATUARUK Toqutsinermut suliaq paasisaqarfiunerusoq

Suliaq toqutsisoqarsimaneratut misissuiffigineqarpoq, inuilli taakku marluk qanoq pasineqarnersut politiit paasissutissiissutigerusunngilaaq. Inuit taakku pasilliutigineqartunut qanoq oqaaseqarnerat Jan Lambertsenip aamma akissuteqarfigerusunngilaa.

- Tamanna misissuineq eqqarsaatigalugu oqaaseqarfigisinnaanngilara, Jan Lambertsen oqarpoq.

Angut arnarlu Ilulissani najugaqatigiipput. Najugaqatigiit tigusarineqarneranni politiit taakku angerlarsimaffianni misissueqqissaarput.

- Uppernarsaatinik assigiinngitsualunnik nassaartoqarpoq, taakkuli pillugit itinerusumik oqaaseqarsinnaanngilanga. Pinerluttoqarsimanera misisugassanik nassaartoqarpoq, paasissutissanillu aamma atassusigassaqarluni, Jan Lambertsen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat