Ilulissani meeqqat angerlarsimaffiat 200.000 koruuninnappoq
Ilulissani Hotel Arctic-imi poorskikkunni qalipakkanik saqqummersitsinerup ulluani siullermi aningaasat 200.000 koruunit sinnillit, Ilulissani Meeqqat Angerlarsimaffiutaanut tapiissutigineqartussanngorput.
Allattoq Elisa Isaksen
apriilip 19-at 2014 14:26
Qalipakkat 39-t qalipakkanik assilialiortartunit nunani tamalaani ilisimaneqartunit Christian Lemmerz-imit aamma Michael Kvium-imit tunissutaapput. Qalipaasut taakku siullermeerlutik Nunatsinni saqqummersitsipput.
Qalipaasut taakku marluullutik aalajangersimapput qalipakkaminnit tunisaminnit isertitat tamarmik, Ilulissani Meeqqat Angerlarsimaffiutaanut tunissutigineqassasut.
Qalipakkat ilaat 9.500 koruuneqarput ilaallu allaat 125.000 koruuneqarlutik.
Qalipaasut marluullutik Nunatsinni saqqummersitsinertik takorluukkaminnik piviusunngortitsinerusoq oqaatigaat.
Qalipakkanik saqqummersitat Hotel Arctic-imi aggustip naanissaata tungaanut nivingatinneqassapput, Hotel Arctic aamma Air Greenland saquummersitsinermi aningaasaliisuupput.
