Ilulissani Kattusseqatigiit tamaviaartariaqassapput

Kommunemut qinersinissami Ilulissat kommuneani borgmesteri Anthon Frederiksen, kommunalbestyrelsemi pissaaneq tigummiinnassaguniuk qineqqusaarnissami tamaviaartariaqassaaq.

Kommunalbestyrelsemut qinersinermi kingullermi Attaviittut Kattusseqatigiit qinersinermi ajugaallutik kommunalbestyrelsemi amerlanerussuteqaraluartut, qinigaaffiup iluani Attaviittut Kattusseqatigiit sinnerlugit qinigaasimasut marluk tassaasut, Lars Erik Gabrielsen aammalu Jeremias Jensen, Siumut partiianut nuupput, taamaasillunilu qinigaaffiup sinnerani Attaviittut Kattusseqatigiit Ilulissani kommunalbestyrelsemi ikinnerussuteqalerlutik. Attaviittut Kattusseqatigiit ukioq manna komuunimut qinersinissami qinigassanngortitassaat 19-iupput, taakkunannga affaasa missai nunaqarfimmeerlutik. Kommunalbestyrelsimi ilaasortaareersut Helen Johansen aammalu Martha Broberg, Anthon Frederiksen peqatigalugu qinigassanngorteqqipput. Kattusseqatigiinni qinigassanngorteqataasunut ilaavoq umiatsiaararsortut peqatigiiffiani Siutami siulittaasuusarsimasoq Niels Kristian Vetterlain. Siumut sinnerlugu qinigassanngortittut katillutik 17-iupput, qinigassanngorteqqittullu tassaapput Ilulissani Siumup partiiani siulittaasoq Palle Jeremiassen, aammalu viceborgmesteri Lars Erik Gabrielsen Siumullu sinnerlugu qinigassanngortittut inuiaqatigiinnilu malunnaateqarluartut tassaapput Ilulissani Mathias Sotrorch-ip atuarfiani pisortaq Johanne Olsen aammalu qimussertartut peqatigiiffiani suleqataalluartartoq Britta Mortensen. Ole Dorph maannakkut inatsisartuni ilaasortaasoq kommunalbestyrelsemut qinigassanngorteqqinnianngilaq. Inuusunnerusuni SIS sinnerlugu qinigassanngortippoq Linda Jeremiassen. Atassutip partiiata kommunimut qinersinissami qinigassanngortitai pingasuinnaapput, tassaallutik Ena Guldager, Emilie Jensen aammalu Markus Thorleifsen. Atssut sinnerlugu kommunalbestyrelsemut ilaasortaasoq Johan Gundel qinigassanngorteqqinnianngilaq.

Inuit ataqatigiit kommunalbestyrelsemut qinigassanngortitai katillugit arfineq marluupput, tassani Attaviittut Kattusseqatigiinni ilaasortaasimasoq Ole Thorleifsen aammalu Atassutip partiianut ilaasortaasimasoq Godmann Filemonsen IA-mut nuullutik kommunalbestyrelsemut qineqqusaarniarput. Kingullermik Inatsisartunut qinersinermi IA sinnerlugu qineqqusaartoq Bent B Kristiansen IA sinnerlugu kommunalbestyrelsemut qineqqusaarniarpoq.

Demokraatit Ilulissat kommuneani qinigassanngortitaqanngillat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat