Ilulissani Inuit Ataqatigiit Siumullu suleqatigiinnissamik isumaqatigiissuteqarput

Ilulissat kommunalbestyrelsiani Inuit Ataqatigiit Siumullu ukiuni tulliuttuni suleqatigiinnissamut tallimanngormat isumaqatigiissuteqarput.

Isumaqatigiinniarnermi ilaatigut isumaqatigiissutigineqarpoq meeqqanut inuusuttuaqqanullu sullissineq pitsanngorsarneqassasoq kiisalu aalisarnermut politikkikkut suliniarneq tulluussarneqassasoq.

- Meeqqanik inuusuttuaqqanut sullissineq maannakkut aningaasartuutaavaallaartarpoq, taamaattumik meeqqanut arsaarinnittarnerni meeqqanunuullu sumiginnalkkanut sullissinermi suleriutsit maannamut atuuttut naliliiffigineqaqqinnissaat suleriaatsillu nutaat pinaveersaartitsineq aallaavigalugu suliniarnissarput siunnerfigaarput, Inuit Ataqatigiit sinnerlugu Kommunalbestyrelsimi ilaasortaq viceborgmesteriusorlu Bendt B. Kristiansen oqarpoq.

Bendt B. Kristiansen aamma oqarpoq, aalisarnikkut politikki EU-mut piumasarisaanut tulluussarneqarnissaa anguniarlugu aalisarnermut siunnersortimik atorfinititsisoqarnissaa isumaqatigiissutigineqartoq.

Kommunalbestyrelsimi ataatsimiititaliat inuttalersorneqarneri allanngortinneqarput, Siumut ataatsimiititalianik pingasunik Inuit Ataqatigiillu ataatsimik siulittaasuuffeqalerlutik.

Borgmesterip aningaasaqarnermut ataatsimiititaliaq ataavartumik siulittaassuffigaa.

- Ataatsimiititaliami siulittaasuuffik tigummisimasarput Siumup suleqatigilerneratigut annaavarput; kisianni Siumup suleqatigilernera akisunaartutut oqaatigisinnaanngilarput, Siumut suleqatigineratigut namminissarsiunngitsumik innuttaasut toqqissisimanerusumik sullinneqarsinnaalernerat qularutiginnginnatsigu. Bendt B. Kristiansen oqarpoq.

Ilulissani Siumut siulittaasuat kommunalbestyrelsimilu ilaasortaq Palle Jerimiassen oqarpoq isumaqatigiissut iluarisimaaritsik.

- Isumaqatigiissut neriulluarfigaarput. Anguniagassat unamminartut pilerinartullu naammassiniarnissaat qilaanaaralugu suleqatigiinneq aallartipparput, Palle Jeremiassen oqarpoq.

Ilulissani Inuit Ataqatigiit Kattusseqatigiit Partiiannik suleqateqarnerigaluartik taamaatippaat borgmesterip Anthon Frederiksen-ip borgmesteriutigaluni Inatsisartuni ilaasortaarusummat, illuatungiliuttulli ataavartumik borgmestereqarnissartik kissaatigalugu.

Siumut Inuit Ataqatigiillu isumaqatigiissutaat ulluni qaninnerni atsiorneqassaaq.

Ilulissat kommunalbestyrelsiani Siumut arfinilinnik, Kattusseqatigiit Partiiat tallimanik kiisalu Inuit Ataqatigiit marlunnik ilaasortaatitaqarput, isumaqatigiissullu atsiorneqarpat Kattusseqatigiit Partiianneersoq Anthon Frederiksen kommunalbestyrelsemi ikinnerussuteqaraluarluni borgmesteriulissaaq.