Umiarsuit takornariartaatit arfinilissuit ataatsikkut illoqarfik tikeraassavaat. Taakkua ilaat umiarsuarujussuaq Costa Luminosa 2.000-it sinnerlugit ilaasoqarpoq.
Kommunimi inuussutissarsiornermut takornariaqarnermut inerisaavik Destination Avannaa, Qaasuitsup Kommuniani Kangiata allaffeqarfia kiisalu illoqarfimmi takornariartitsinermik suliaqartut suliamik ataqatigiissaarillutik tamaviannguat suliniarsimapput, taamaalillutik takornariat Iluliarmiullu pissanganartumik ullorsiorniassammata.
Tikeraartorpassuaqarneranut atasumik umiarsualivimmi takornariat niuffigisassaanni ilaatigut sanalukkanik tuniniaasoqassaaq.
Qaasuitsup Kommunia isumatusaarluni illoqarfimmi takornariat qimminut qanillivallaaqqunagit allagartalersuisimavoq.
Ullup ingerlanerani Sermermiunut sermimut isikkivilimmut angallannersuaqassaaq, taamaattumillu kommunimi sulisut arlallit najuutissallutik nunap tamatuma mianernartup takornarianit ajoquserneqannginnissaa qulakkeerniarlugu.