Ilulissani innutaasut corona pillugu: Annilaanganaqaaq

Ilulissani coronavirusimik tunillatsissimasoq nutaaq sapaatit akunnera kingulleq nalunaarutigineqarpoq. Ilulissani innuttaasut annilaangapput.

Ilulissani Aasiannilu tunillatsissismasut nutaat marluk paasineqartut Naalakkersuisut siulittaasuata Kim Kielsenip nakorsaanerullu Henrik L. Hansenip maajip 27-iani nalunaarutigaat. Taakkulu arlaannaalluunniit napparsimarulunngitsoq, nakorsaaneq oqarpoq.
 
Tunillatsissimasoq Ilulissaniittoq mittarfinnik sanaartornermik suliaqartuneersuuvoq.
 
KNR Ilulissaniippoq, innuttaasullu annilaangasut tupaqqasullu naapippagut.
 
 
Arnannguaq Alataq Qaanaameersuuvoq. Taassuma Ilulissani pikkorissarluni paasivaa coronamik tunillatsissimasoq Ilulissaniittoq.
 
- Kursuserluta aallarteqqammerluta allaffimmioq iserami imalu oqarluni coronartortalik. Qiassannik tupillunga alla eqqarsaatiginagit qitornakka. Neriuppunga aqagu angerlassallunga. Sianiginaqaaq sunalu attorlugu spritterluni, inuit naapikkaanni kisianni ungasinniarlugit.
 
 
 
 
Nukannguaq Johansen katsorsarneqarsinnaanngitsumik nappaateqarami sioqqutsilluni pensionisisarpoq. Taamaammallu nappaassuarmut annilaangalluni.
 
- Soorunalimi tupannarpoq aamma paasereeraluarlugu aallannginnermini misissortikkami ajunngissimagaluartoq maangali tikereerluni paasineqarluni coronartoq. Tupannarpoq assorujuk innuttaasuulluni taamaammat sakkortunerpaamik misissortittarneq ingerlasariaqarpoq.
 
- Annilaanganarpoq sualummik nappaateqartuulluni immaqa aamma maani Ilulissani amerlasoorpassuit nappaateqarput aamma taakku tuniliutissanngikkutsigit tikittartut iluamik sillimaffigineqarlutillu nakkutigineqartariaqarput.
 
 
 
 
Karen Jensen Ilulissani tunillatsissimasumik nalunaaruteqartoqarmat sulivoq.
 
- Soorunalimi tupappunga aamma annilaarnartorujuuvoq. Amerliartuinnassasoralugit siooranarluni. Imaalinarluni: immaqa aattortinniarlerpunga.
 
- Juunip 19-iani Danmarkimut aallartussaagaluarpugut. Kisianni taamaatiinnarlugu ullumi nalunaarutigiinnarpara. Uggornaq, nuanninngilaq tamakku sakkortuut nunatsinnut takkussuutilerneri. Neriuuteqaraluarpunga suna tamarmi aaqqeqqissassoq. 
 
Inuit coronvirusimik maannakkorpiaq tunillanneqarsimasuusut nunatsinniittut marluk ajunngillat. Nunatta nakorsaanerata, Henrik L. Hansen, tamanna tusagassiortunut ippassaq sassarluni oqaaatigaa. Arlaannaalluunniit perulunngilaq, allanilluunniit tunillaasimasinnaanerannik malunnartoqanngilaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat