Ilulissani innaallagissamut akit qaffannissaat ilimanarsivoq

Ilulissat avannaatungaani Paakitsumi erngup nukinganik nukissiorfiliaq piareerluni atulerpat, atuisartut akiliutaannut akinik qaffaanermik kinguneqassanersoq Qaasuitsup Kommuniani borgmesterip Jess Svanep Namminersorlutik Oqartussanut maajip 17-ani apeqquteqaatigaa.

Sisimiuni erngup nukinga atorlugu nukissiorfiup atulernerata kinguneranik innaallagissamut atuinermut akiliutip pingajorarterutaa pallillugu qaffanneqarsimanera borgmesterip apeqquteqaamminut tunngavilersuutiga.

Ineqarnermut Ineqarnermut, Attaveqarnermut Angallannermullu Naalakkersuisoq Jens B. Frederiksen borgmester Jess Svanemut ima akissuteqarpoq:

- Taanna massakkut oqaatigisinnaanngilara. Paasisakka naapertorlugit suli naatsorsorneqarsimannginnami qanoq kinguneqassanersoq. Kisianni soorlu Sisimiut assersuutigigaanni qaffannissaa ilimanarsinnaaqaaq , ukiullu ingerlanerini appariartorluni, Jens B. Frederiksen oqarpoq.

Qaqagumi taava innaallagissamut akiliutip qaffaatissaa nalunarunnaassava?

- Tassa taanna oqaatigisinnaanngilara. Sanaartornerup naammassiartornerani  takkunnissaa ilimanarsinnaavoq. Aamma kissaatigereernikuuarput piaarnerpaamik sapinngisamik paasisitsiniaaneq ingerlatilissagipput. Imaanngitsoq aatsaat qaffaagutta paasissutissiissasugut, Jens B. Frederiksen oqarpoq.

Nukissiorfissaq turbine siulleq atorlugu innaallagissamik pilersuineq aappaagu novembarip qaammataani aallartinnissaa, 2013-imilu tamakkiisumillu pilersuisinnaalernissaa Nukissiorfiit Ilulissat avannaatungaani Paakitsumi erngup nukinga atorlugu nukissiorfimmik sanatitsisuusut naatsorsuutigaat.