Ilulissani illassamaaleqaat

Aliikkusersuineq Sermermiuni pissaaq pingasunngornermi, sisamanngornermi tallimanngornermilu billetillu maanna tunisaallualereerput.

- Unnuit pingasut aliikkusersuitinniarparput ilimagigatsigu soqutigineqangaatsiarnissaat, Sermermiuni sulisoq Jonas Fleischer KNR.gl-mut oqarpoq.

Aliikkusersuineq 'Aaseralaat' Katuami aliikkusersuutigineqarpoq januarip 19-at soqutigineqarneralu annertummat unnuk taanna marloriarlutik aliikkusersuitinneqarput.

Maanna tassa Ilulissani aliikkusersuisussanngorput taannalu Katuami takutinneqartup asseqqinnaarissanngilaa.

- Katuami piumaffigineqarpugut nalunaaquttap akunnera ataaseq aliikkusersuissasugut. Maanna periarfissaqalerpugut nalunaaquttap akunnera ataaseq minutsillu 30-it aliikkusersuinissamut, Piitannguaq Alaufensen KNR.gl-mut oqarpoq.

Piitannguaq Alaufesen aamma Valerius Nielsen Katuamiinnermi immikkut ataasiarlutik takutitseriarlutik ataatsimoorlutik aamma takutitsipput. Maanna marloriarlutik immikkut aliikkusersuissamaalerput.

- Takutitassama ilagaat 'Kingulliarsussuaq Aapasoq' siornatigut takutittariikkannut 'Uulliarsuaq Aapasumut' kinguaajutitara, Piitannguaq Alaufesen oqarpoq.

Valerius Nielsen Sisimiuni najugaqartoq Piitannguaq Alaufesen Ilulissani najugaqarpoq. Valerius Nielsenilu Upernavimmi ilaqutariinnut højskolertitsereerluni Ilulissanut akunninnerminik sivitsuisinnaariarmat Ilulissani aliikkusersuinissaat iluatsilerpoq.

Poul Wille erinarsorluni akunniliisassaaq ilaatigut Elvis Presley ilaarlugu aammali nammineq sanaaminik atuiumaarluni.