Ilulissani ikuallattoqartoq
Ilulissat mittarfiata eqqannguani maanna ikuallattoqarpoq.
Tallimanngornermi unnukkut nalunaaqutaq 19.31 nalunaartoqarpoq.
Sanasut campiata sutortarfiani ikuallattoq aallartippoq, Kalaallit Nunaata Politiivi paasissutissiipput.
Illoqarfimmi qatserisartut mittarfiullu qatserisartui sumiiffimmiipput.
- Qatserisartut sumiiffimmi maanna sulipput, Kalaallit Nunaata Politiivini sillimasut pisortaat Bent Johnsen oqarpoq.
Ikuallattoqarneranut suna pissutaanersoq upalungaarsimasuniit oqaatigissallugu siusippallaarpoq.
Ilulissaniit aamma Ilulissanut timmisartuussinerit tamarmik ullumi naammassineqareersimasut, taamaattumillu ikuallattoqarnera pissutigalugu kinguaattoortoqarnanilu timmisartuussinerit taamaatiinnarneqarsimanngitsut, Bent Johnsen Sermitsiamut paasissutissiivoq.
Campi inoqanngitsoq taamaattumillu ajoqusertoqanngitsoq, Greenland Airports facebookimini paasissutissiivoq.
