Ilulissani ikuallattoqarneranut pissutaasoq suli paasinngilaat

- Ikuallannerujussuuvoq qaartoornissamut navianartoq, sillimaniarnermut pisortap Johan Høeg Hansenip Ilulissani biililiorfiup saaffiorfiullu VVS-Firmap poorskimi ikuallannera taama oqaatigaa.

Politiit ikuallannermut pissutaasoq suli paasinngilaat misissuippullu.

- Assorujussuaq tupannarpoq, ajorpoq nuanneranilu, VVS-imik piginneqataasut ilaat Kurt Danielsen oqarpoq.

- Biilileriffik saffiorfillu nungullutik ikuallapput.  Suliffeqarfiup nungulluni ikuallannerata kingorna oqarpoq.

Sulisut poorskimi sulinngiffeqarmata suliffeqarfiup ikuallannerani inoqanngilaq. Quassuttuut qernertuinnaat suliffillu avaanngunarlunilu paaginnaq taakkuupput maanna suliffeqarfikumi takuneqarsinnaasut.

Suliffeqarfillu ikummalertorsimaqisoq, sillimaniarnermut pisortaq Johan Høeg Hansen nassuiaavoq.

- Ikuallannermi ipinartup annertusiartornera pissutaalluni ingasalluinnartumik suliffeqarfik ikummalertorpoq, suliffeqarfiup illutaani marluusuni ipinartut ikumatitsipput. Tamatumalu kingunerisaanik suliffeqarfimmi puiaasat naqitsinilinnik imallit qaartoornissaannut navianarsilluni.

Puiaasat naqitsinilinnik imallit quligiluat suliffeqarfimmi pigineqartut ilaat pingasut iltimik acetylen-inilluunniit imaqarput kissattoorujussuarnikkullu qaartoornissaat ernummatigineqarsimalluni. Taamaattumik qatserisartut qatserinertik unitsillugu qimagussortariaqarsimapput.

- Takusinnaaleratsigu qaartoortoqarnissaanut ulorianartorsiorluta suliffeqarfik ikuallattoq qimapparput. Politiillu suleqatigalugit innuttaasut sillimaniarnerat qularnaarniarlugu ikuallattumiit 100 meterisut ungasitsigisup ilua aqqutaajunnaarlugu assersorparput, Johan Høeg Hansen nassuiaavoq.

Nalunaaqquttap akunneri qulingiluat qatserisoqarpoq. Qatserisartut ilaat ipinartumik najuussuisimanermik kingunerisaanik napparsimmavimmi nakkutigineqarpoq, iluarseriaramilu qatserinermi suleqataaqqilerluni.

Qatserisartut 27-usut mittarfiup qatserisartuinit aamma ikiorserneqarput.

Suliffeqarfiup ikuallanneranut suna pissutaasimanersoq politiinit suli paasineqanngilaq.

- Ikuallattoornermut suut patsisaanersut suli ilisimanngilagut, vicepolitimester Morten Nielsen oqarpoq.

Ilulissani suliffeqarfiit ilaasa ikuallarujussuarnerata kingorna qatserisartut atortui ullutsinnut naleqquttuunersut paasiniarlugu maanna misissorneqaleruttorput.