Ilulissani ikiaroornartumik eqqusseriaraluartoq tigusarineqartoq
Angut 30-nik ukiulik, ikiaroornartumik hashimik 150 grammimik Ilulissanut eqqusseriaraluartoq, akiligassinneqarnissaminik pinerloqqikkunilu pinerluuteqarsimasut inissiisarfimmiinnissaminik pineqaatissinneqarnissani naatsorsuutigissavaa.
Allattoq Najaaraq Egede
januaarip 11-at 2010 09:16
Timmisartumik tikittut Kangerlussuarmi politiit qimmiannit narajorneqarmata angut ikiaroornartumik nassataqarnissaannik ilimanaateqartoq paasineqarpoq, misissoqqissaarnissaalu piffissaqarfigineqanngimmat apuuffissaani Ilulissani politiit misissuinissaannik kalerrinneqarput.
Angut Ilulissanut tikimmat tarrarsuisarfiliaanneqarpoq, misissuinermilu angut hashimik katillugit 150 gramminik iioraallunilu iterminut manngussuisimasoq paasineqarpoq.
30-inik ukiulik misissorneqareernermi kingorna iperagaavoq, akiliisitaanissanilu naatsorsuutigissavaa.
- Angut ukiumi tulliuttumi assingusumik pinerluuteqaruni pineqaatissinneqarsimasunut inissiisarfimmittussanngoriaannaavoq, Ilulissani politeeqarfimmi pisortaq, Preben Markvardsen oqarpoq.
