Ilulissani GU-qalissaaq
Aanaanaasup Qaasuitsup Kommunianilu kommunimut qinigassanngortittup tamanna nuannaarutigaa. Ane Lone Bagger Demokraatit sinnerlugit apriilip aappaani kommunimut qinigassanngortippoq. Kommunit avannersaanni ilinniarnissamut periarfissat aapperneqarnissaat qilanaarivaa.
- Suliffissaaleqisut kisitsisitigut nalunaarsorneqarsimaneri qimerlooraanni, suliffissaaleqisut ilinniarsimanngitsut immikkoortumi 1-imi 2-milu nalunaarsorneqarsimasut 25-it inorlugit ukioqartut februaarip naalernerani 462-iuneri tupaallannarpoq! Uangami isumaga malillugu inuusuttut 25-it inorlugit ukiullit ilinniakkamik ingerlataqartussaagaluarput. Inuusuttut suliffissaaleqisut pisortanit pisartagaqartiinnarnagit ilinnialersittariaqarpagut. Ilisimasat piginnaasallu inunnut ataasiakkaanut kiffaanngissuseqarnerulersitsisarput. Inuit ataasiakkaat periarfissaqarnerulersarput, inuunermilu nammineersinnaanissaat nukittorsarneqarluni, Ane Lone Bagger isumaqarpoq.
Meeqqat atuarfiat sullissiviussaaq kulturimik ingerlataqartoq, meeqqallu tassani atuartinneqarnissaa pissusissamisuuginnarluni, tamallu inuiaqatigiinni inissisimaffinnit tamaneersunik ikinngutitaartorfigalugulu inuit assigiinngitsuunerannik kikkullu tamaasa inissaqartinneqarnerinut paasisaqarfigisinnaasassaat. Atuartut suliatigut piginnaasassaannut piumasaqaataasut klassini alloriarfiusuni ataasiakkaani nuna tamakkerlugu atuartitsissutissatut pilersaarutitigut pittuttuiffiusutigut qulakkeerniarneqassapput. Ilinniartitsisut nukarlerni, akullerni angajullernilu qaffasissutitsini assigiinngitsuni atuartitsinissamut ilinniarsimasut atuartut ataasiaakkat sapinngisamik sutigut tamatigut unammilligassaqartinneqarnissaa qulakkiissavaat.
Ilinniarnerup inuup nammineq akisussaaffigigaa naqissusissallugu pingaaruteqarpoq. Taamaammat meeqqat qasuerluarsimallutik atuartortarnissaat, ilinniakkerisarnissaat, ilinniartitsisunut atuaqatiminnullu ataqqinninnermik takutitsinissaat atuartitsinermullu eqeersimaartumik peqataanissaat atuartut angajoqqaavisalu qulakkiissallugu nammineq akisussaaffigaat. Meeqqat atuarfianit soraarummeereernerup kingorna inuiaqatigiit atuartut taakku ilinniarnikkut ingerlaqqinnissaannut piareersaateqarfigisimassavaat. Taakkununnga ilaaovq ilinniarnertuunngorniarfik, taamaammat Ilulissani GU-mik pilersitisnissamut taama isumaqataatigisoqarnera nuannaarutigivara, Ane Lone Bagger oqarpoq.
