Ilulissani erngup nukinganik nukissiorfik sanagaat
Nukissiorfiit innaallagialiornissamik suliniuteqarnerat massakkut ingerlallualeruttorpoq, tamannalu Ilulissap innaallagissamik pilersornissaanik kinguneqassaaq. Oktoberip qaammataa misileraaffittut isigineqarpoq, novembarillu aallartinneraniit erngup nukinganik nukissiorfimmiit nukissamik ataavartumik pilersuisoqalernissaa naatsorsuutigineqarpoq.
-Innaallagissiorfik nillorsaataa illunut kissassaatitut atorneqartoq taarserneqartussap ukiumut uulia 6 million literi atortarpaa, Co2-mik aniatsitsinera annertulluni, taannalu taarserlugu nukissamik ataavartumik taarserneqassaaq. Aallaqqaammut turbine kaavittoq ataaseq atussavarput, tamakkiisumilli ingerlaaleriarunik erngup nukinganik nukissiorfiup nutaap 65 gigawatt timer pilersisissinnaalissavaa, taama Nukissiorfimmi attaveqarnermut iliuusissanut aaqqissuisoq Anja Rosa Quist oqarpoq.
Erngup nukinganik nukissiorfik nutaaq Nukissiorfiit nukissiorfiisa annersaasa aapparivaat, suliffeqarfiup aningaasat tamatumunnga atugai amerlapput, massakkutulli isikkoqartillugu niuerluarneruvoq. Erngup nukinganik nukissiorfiit taamaakkajuttarput, Utoqqarmiut Kangerluarsunnguani soorlu taama pisoqartoq. Pilersaarut malillugu ukiut 15-it ingerlaneranni erngup nukinganik nukissiorfiup imminut akilersinnaanissaa pilersaarutaagaluartoq sioqqullugu imminut akilerpoq.
-Ilulissani erngup nukinganik nukissiorfik 568 million koruuninik akeqartoq isumaqatigiissut malillugu ukiut 15-20-it ingerlanerani akiliutigineqarsimasut utertinneqassasut naatsorsuutigineqarpoq. Nukissiorfik akilerneqareeriarpat pigilissavarput C02-mik mingutsitsinngitsoq ikummatissat atorlugit nukissaq atornagu nukissiorfik. Tamanna aningaasaqarnikkut aamma pinngortitamut mingutsinnginnissap tungaatigut niuerluarneruvoq, taama Anja Rosa Quist knr.gl-imut oqarpoq.