Ilulissani atuarfik iluarsaatilerpaat

Atuarfik Mathias Storchip illutai pisoqqat isaterneqassapput atuarfiullu ilarujussua annertuumik iluarsaanneqassalluni.

Atuarfik Mathias Storchip iluarsaannissaanik pisariaqartitsineq nutaajunngilaq. Tamanna kommuunit kattunnissaat sioqqulluguli ilisimaneqarpoq. Iluarsaanissamik pisariaqartitsineq Ilulissat Kommuunitoqaata naatsorsorsimagaluarpaa 110 millioner koruuninik akeqassasoq. Maanna atuarfik taanna 1956 sananeqarnermi kingorna allilerneqartarsimasoq 66 millioner koruunit naligannut iluarsaanneqartussanngorpoq.

- Atuarfiup iluarsaannissaanut kissaativut tamaasa ajoraluartumik pinngilavut. Atuartut ikiliartornerat aamma Naalakkersuisut nalilersuinerminni tunaartarisimavaat. Taamaammat atuarfik 66 millioner koruunit naliganut iluarsaanneqartussanngorpoq, Qaasuitsup Kommuniani borgmesteri Jess Svane KNR-imut oqarpoq.

Atuarfiup iluarsaallugulu nutarternissaanut unammisitsisoqarmat Tegnestuen TNTp titartagai ajugaatinneqarput.

Atuarfiup pisoqartaa Qupaloraarsuup tungaanut sammisoq isaterneqassaaq inillu atuartitsiviit peerneqartut nutaanik taarserneqassanngillat atuartut ikiliartornerat pissutigalugu.

Atuarfiup pisoqartaanik isaterineq mianersortumik ingerlanneqartariaqassaaq. Atuarfik Mathias Storchip pisoqartaa ilaatigut asbest atorlugu iigalersorneqarsimavoq.

Silataani qisuit krydsfinerit aamma ussiitsuupput upernaakkullu kissakkaagat init atuartitsiviit kissarujussuartarlutik, Qaasuitsup Kommunia atuarfiup iluarsaannissaa pillugu tusarniaassummini ilaatigut taama allappoq.

- Iluarsaaneq ukiaq aallartittussaagaluarpoq. Kisianni ukiup affaanik kinguaattoorpugut. Iluarsaaneq 2012-mi 2013-milu ingerlanneqartussatut naatsorsuutaavoq, Jess Svane oqarpoq.