Ilulissani atornerlugaasimasut ikiorniarlugit pikkorissartitsisoqalerpoq
Ilulissani napparsimaveqarfiup arnat amerligaluttuinnartut meeraanerminni ukiorpassuarni atornerlugaasimasut paasisaqarfigisarpai. Atornerlugaasimasut paasigasuarniarlugit ikiorsinnaaniarlugillu qanittukkut pikkorissaatitsisoqassaaq.
Qanittukkut tarnip pissusaanik ilisimasalik Ilulissanut tikissaaq napparsimaveqarfimmeersut, inunnik isumaginnitseqarfimmeersut, meeqqerivinneersut, atuarfinneersut kiisalu politiineersut pikkorissariartorlugit. Assigiiaarnerusumik ikiorsiisarnissaq pinaveersaatitsinissarlu anguniarlugu.
Ilulissani nakorsaaneq Eskild Bueskov oqarpoq amiilaarnaannartumik arnat amerlassusillit meeraanerminni atornerlugaasarsimapput.
Ajornartorsiut takkunnerusarnerarpaa arnat naartuleraangata.
Qanilaarneq nuannersuunani naalliunnertut arnat misiginerusaramikku, Eskild Bueskov oqarpoq.
Sooq arnat qanilaarnermik asanninnermillu meeqqaminnut misiginnissinnaajunnaartarpat?
Atornerlugaanermikkut qanilaarneq nuannersumik misiginagu aliasunnermik annilaanganermillu qanilaarneq isigilertaramikku, nakorsaaneq oqarpoq.
Ilisimaneqareersutut Ilulissani tarnip pissusaanik ilinniarsimasumik sulisoqanngilaq, taavami pikkorissaanikkut pinaveersaartitsineq imaluunniit ikiorsiinerulernissaq anguniarneqarnerluni?
Pikkoriffiginerulerniarparput atornerlunneqarsimasut pissusilersornerisigut qanoq paasipallannerunissaat aammalumi atornerlunneqarsimasut ikiornerunissaat pikkoriffiginerulerusupparput, Ilulissani nakorsaaneq Eskild Bueskov oqarpoq.
