Ilulissani annaassiniarneq iluatsilluartoq
Umiatsiaaraq marlunnik inuttaqartoq, Ilulissat kangerluani 30 km.-imik ungasissuseqartumiittumi motooriarsimasoq. Ajornartorsiortunut qanigisaasut marloriaq umiatsiaaqqamik kingusinnerusukkullu, angallamik 40 fodsimik angitigisumik ikiuiniarlutik misiliisimagaluarput, kisianni sikoqarpallaarnera silarlunneralu pissutigalugu, tunniutiinnartariaqarsimapput.
Ukioq nutaaq inunnut marlunnut umiatsiaaqqamik Ilulissat kangerluanukarsimasunut annilaarnartumik aallartippoq. Umiatsiaarartut qanigisaat politiinut nalunaaqutaq 19.00 nalunaaruteqarput, 40 fodsimik angissuseqartumik marloriarlutik ajutooqqasunut ikiuukkiartorniarsimagaluarlutik sikoqarpallaarnera silallu ajornera peqqutigalugu umiatsiaaraq tikissinnaasimanagu.
Nunatsinni politiit tusagassiutinut taama allapput.
Politiit umiatsiaaqqamiittut inuit marluk oqaloqatigereerlugit aalajangerput anoraasuarnera kujasimmik 18 m/s-mik sakkortutigisalermat annaassiniarneq aallartinneqartariaqartoq.
Air Greenlandip qulimiguuliutaa SAR nalunaaqutaq marlunngunngitsiartoq aallartinneqarpoq, qulimiguuliup ikiuulluarneratigut ajornartooqqasut ajunngitsut qiiasulli Ilulissanut pingasunut arfineq pingasunngortoq tikiunneqarput.