QIMMIT NAPPAATAAT Ilulissani akiuussutissaqanngilaq
- Paasisinnaalluarpakka. Kisianni erseqqissaatigerusuppara qimmit Qeqertami Saqqamiittullu annaattariaqarneri peqqutigalugu akiuussutissaatitsinnik nunguutsisooratta. Akiuussutissaateqartuartaraluarpugut, uumasut nakorsaat Sanne Eline Wennerberg oqarpoq.
Aamma atuaruk Qimmit 51-it toqunneqarput
Qimmillu akiuussutissaasa Ilulissiaanneqalereertut, tikiunneqarnissaat nukingisaarnarsisoq, taassuma oqaatigaa.
- Sukkanerusumik tikisipallannissaat kissaatiginaraluarpoq. Akiuussutissalli assartorneqartillugit nillataartitsivimmiitsinneqartussaammata, Air Greenlandillu timmisartuutai nillataartitsiveqanngimmata, ajoraluartumik timmisartuunneqapallassinnaanngillat. Uggornaqaaq suut tamarmik ataatsikkoormata, allatulli ajornaqaaq.
Perlerornermut akiuussutissat qimmillu nappataannut akiuussutissat, DHP-vaccinemik taaneqartartoq, imissutigineqartut tamanut naammassasut Sanne Eline Wennerbergip neriorsuutigaa. Taamaattorli:
- Perlerornermut akiuussutissat tamanut naammapput. Umiarsuarlu tikeriarpat qimmit nappaataannut akiuussutissat pigeqqilissavagut. Eqqarsarluarnissarput pingaartuuvoq, eqqortumillu akiuussutissaaliisarluta.
Aamma atuaruk Pinngitsaaliissummik kapineqartalernissaat siunnersuutigineqalerpoq
Ilulissani pisoq Sanne Eline Wennerbergimut eqqarsalersitsivoq.
- Qimmillit paasissutissiiffigineqaqattaartuartariaqartut paasivara. Neriuppungalu kommunimi qimmit amerlassusaannik nakkutiginninnerunissaq ilikkaraat. Qimmimmi qanoq amerlatigineri ilisimaneruppassuk, akiuussutissat peqqumaatigisagut naammannerusassapput, Sanne Eline Wennerberg oqarpoq, nangillunilu:
- Qassinut ammasarfeqarnitsinnik silatitsinni matup eqqaani allagartaqarpoq. Peqannginninni saaffiginninniaraanni, oqarasuaatip normua aamma allassimavoq. Normu taanna mobilinnut ingerlaqqittarpoq, periarfissaqartillungalu sianeqqittarpunga.
