Ilulissani akerliussutsimik takutitsipput
Senatorip qiimaqisup aammalu ammasumik pissusilersortup John McCain-ip Ilulissat kangianut sermersuarmut umiatsiamik ualeq manna alakkaatinneqalerluni akerliussutsimik takutitsisut naapippai.
Senator John McCain, amerikami præsidentinngortussatut amerlasuunit ilimagineqartup akerliussutsiminnik takutitsillutik katersuussimasut ualeq manna Ilulissat umiarsualivianni piffissaqarluarluni ilassiorpai.
Akerliussutsiminnik takutitsisut piumasaraat USA avatangiisit illersorneqarnissaannut annerusumik peqataassasoq aammalu avatangiisit pillugit Kyotomi isumaqatigiissummut atsiussasoq.
Senator John McCain aperaarput Kalaallit Nunaannut tikeraarnera amerikami avatangiisit pillugit politikkimik sunniuteqassanersoq:
Aap, tamanna neriuutigaara, taamaammat senatoreqatikka arlallit peqatigalugit nunassinnut tikeraarpunga, taamaaliornikkut nammineerluta silaannaap allanngortiartornerata kingunipilui nunarsuarmi oqallisaaqisut takusinnaaniassagatsigit, tamannarpiarmi pillugu maaniippugut Senator John McCain radioaviisimut oqarpoq.
Aperaarput amerikami naalaakkersuisunut sunik apuussiumaarnersoq, tassungalu akivoq avatangiisit allanngoriartornerat nammineq takusani pillugu oqaluttuassalluni piumasarissallugulu massakkut iliuuseqartoqarnissaa.
John McCain amerikami præsidentinngussasoq siulittuutigineqartaannarmat aperaarput nammineq præsidentinngoruni avatangiisit pillugit politikkimik allannguissanersoq:
Præsidentinngorniassallunga aalajangissaguma tamanna ilissinnut ilisimatitsissutigiumaarpara, Senator McCain naatsukullammik akivoq.
Danskit nunanut allanut ministeriat Per Stig Møller nunatsinni Danmarkimilu naalaakersuisoqatini peqatigalugit isumalluarpoq aammalu naatsorsuutiginnippoq tikeraareernerup matuma kingorna amerikamiut avatangiisit illersorneqarnissaannut aalaniataartarnerat allanngorumaartoq:
Naatsorsuutigaara matuma kingorna oqaloqatigiinnerit pitsaasut siunnerfigissaartullu aallartissinnaassagigut, massakkummi takutereerparput mingutsitsinerup kingunipiluisa ersiinnartut ilaat, tamannalu annertuumik sunniuteqarpoq, taamaammat tikeraartitsineq manna pingaaruteqartorujussuuvoq, akerliussutsimillu takutitsineq manna, tassalu sermersuup eriagineqarnerunissaanik oqariartuuteqarneq tassarpiaavoq maaniissuterput, Per Stig Møller oqarpoq:
Jens Peter Lange akerliussutsimik takutitsisunut siuttuusoq oqarpoq, takusinnaallugu tikeraartoq nuannaartoq, eqqissisimaqqissaarlunilu, malunnarnerarpaalu suliniuteqarnera ersarissorujussuusoq, aamma paasigunaraa, namminneq eqqortoq oqaatigiartoritsik, tassa nunarsuatsinni silaannaq kissakkiartortoq, sermersuarlu aamma nammineq takugaa. John McCain atsiussappat tamarmik nuannaassallutik
akerliussutsiminnik takutitsisut siuttuat Jens Peter Lange oqarpoq. Tikeraat tikeraartitsisaallu Kangerlussuarmut unnuk manna ingerlassapput Kangerlussuarmiillu Europaliarlutik aqagu aallassapput.
