Ilulissani aallaasersornermut takunnittut tupassimaqaat
- Amuartinnata kiissiilluta umiatsiat marluk malersuuttut takugatsigik isumaqarlunga aallarussisoqarsimammat malersuuttut, saneqqutilerlutalu eqqalermata qimaavugut.
Ullaaralaaq arferngup eqqaani aalisartut inuusuttut marluk Arne Jensen kiisalu Kuluk Hansen sumik isumaqaratik eqqissivillutik kiissiillutik ima misigisaqariasaarput.
- Ullaaq amuarniarluta kiitsiilluta umiatsiat marluk malersuuttajaaramik aappaa angisooq mikisorlu Witt-iorpasittoq, malersuuttajoortut. Nalugatsigit soqutiginnginnatsigit siullermik avannaatungitsinni malersuuttajooramik, taava nalleriartungajalerluta naligiikkamik tunoqqukkiartuaarluta seqqorami marloriarluni. Siullermik seqqortaaramik tupannermut ingerlaannaq avammut qimaagatta, avammut aallarluta, aallarteriarlugu aquteralaga.Tupannarami assut amuarsimasuugutta suli qaninnerusimassagaluarpaatigut .
Arne Jensen taamatut oqaluttuarpoq aalisaqataa Kuluk Hansen ima nangippoq:
-Isumaqaraluarama asuli aallarussisimallutik malersuuttajoortulluunniit sunaaffa taamaassimanngitsoq tupannarami annilaanganaasalluni tassami annilaanganarpoq taamaattumik takussanani ilimasunngeruttorluta kiitseerusaarluta qujanartumik amuannginnatta 1,10
Umiatsiap mikinerup inuttai nunamut Illumiut tungaannut niusimapput kinguninngualu eqqaattoqaqqilluni.
-Misigisaq avaanngunaqaaq tupannarlunilu, taamaattumik eqqissisaqqaarluta aatsaat arfineq marlunnguukkaatigut amuarluta aallartippugut, Kuluk Hansen Arne Jensenilu oqaluttuarput.
Politimesteri Radioaviisimut oqarpoq nukappiaqqat marluk 14-inik ukiullit imminnut eqqaassimasut. Else Løvstrøm, KNR Avannaani suleqaterput, ilanngutassiamik suliarinnippoq.