Ilulissani aalisartut ilungersunartorsiorput

Ilulissani aalisartut ilungersunartorsioqaat, Atuagagdliutit ullumi saqqummersoq taama aallaaserisaqarpoq.

Qeqertarsuup Tunua sikuunngikkaluarpoq, qaleralinniarnerli ingerlanerluppoq, aalisartunut ukiut qulikkuutaarpassuit ingerlanerini aningaasarsiorfiit pingaarnersarisimasaat nungulerput. Kuttererpassuit ukiut arlaqanngitsut ingerlanerini akiliisinnaajunnaarnissaat Ilulissani Aalisartut Piniartullu Peqatigiiffiata, I.A.P.P.-p, siulersuisuisa ernummatigaat.

- Ukiuunera Ilulissani aalisartunut tamanut aatsaat taama ilungersunartigaaq, peqatigiiffiup siulittaasua, Peter Olsen, AG-mut oqarpoq.

- Qalerallit minnerulersimanerat ikileriarujussuarsimanerallu ukiut kingulliit pingasut-sisamat ingerlaneranni maluginiarsimavarput. Aningaasarliornerup annertuumik eqquinissaa ernummatigaara, Peter Olsen oqarpoq.

Taanna isumaqarpoq, qaleralinnik aalisapiluttoqarsimasoq, Ilulissat eqqaannaanniunngitsoq, aammali ikkannersuarni, kilisaatit qaleralippassuarnik pisaqarfigisartagaanni, ilaatigut qaleraleeqqanik suli suffisinnaanngorsimanngitsunik.

Siulersuisut isumaqarput, qaleraleqassutsimut sanilliullugu Ilulissat eqqaanni aalisartut amerlavallaartut.

Peter Olsen oqarpoq, Aalisarnermut Naalakkersuisoq, Finn Karlsen, peqatigiiffiup arlaleriarluni saaffigisarsimagaa, akissutisisimanatilli.