Ilulissani aalisartut akerliussutsimik takutitsipput

apriilip 19-at 2006 16:53

Ilulissani aalisartut ullumi akerliussutsimik takutitsipput. Naalakkersuisut orsussamut tapiissuteqassanersut paaserusuppaat.

Ilulissani KNAPK-p immikkoortortaqarfia ukiarli oktoberimi kattuffitsik saaffigaat orsussap akia qaffakkiartuinnartoq pillugu naalakkersuisunut saaffiginnissuteqaqqusillutik. Tassunga tunngavigineqarpoq aalisartut pitsaanerusumik ingerlaniassappata tapiiffigineqarnissaannik KNAPK-p naalakkersuisut noqqaaqqugamikkit, ullumikkulli tikillugu tamanna naalakkersuisunit qisuariarfigineqanngilaq.

-KNAPK-p ittua ungasinngitsukkut oqaloqatiginikuuarput, neriorsorpaatigullu ikiorumalluta suliarlu ingerlanniarlugu. Taamaakkaluartoq uagut aalisartut tunniusimaannarusunnata aamma tusartikkusupparput takutikkusullugulu noqqaanerput, Peter Olsen oqarpoq.

Inuit 50-it 60-illu missaanniittut akerliussutsimik takutitsipput, Ilulissanilu KNAPK-p immikkoortortaqarfianit aaqqissuunneqarpoq.