Iluliarujussuit qilalukkanut ulorianartorsiortitsipput
Taamatut ulorianartorsiortitsineq maanna annerulerpoq, iluliarujussuaq Petermann Gletcherimit kaanngartoq Baffinip Kangerliumarnanut qanilliartortillugu. Imartarmi tamanna qilalukkat 80.000-it missaanniittut uumaffigimmassuk, Nunatsiaq Newsimi taama allaaserinittoqarpoq.
Iluliarujussuaq Avanersuarmit 2008-mi kaanngarpoq 250 kvadratkilometerinillu annertussuseqarluni.
Misissuinertigut paasineqarpoq qilalukkat 1,4 kilometerit ingerlareeraangamik anersaarnissartik pisariaqartittaraat. Taamaalilluni qilalukkat ingerlaartut iluliarujussuup ataatigoornerminni sivisuallaamik anersaassanatik ingerlaarunik ipisinnaanissaat takorloorneqarsinnaavoq.
2008-mi novembarimi qilalukkat 600-t missaat Akilinermi Mitsimatalimmit ungasinngitsumi sikkussaallutik ammalataminni toqorarput.
Misissuinerup allap paasinarsisippaa qilalukkat maannamut oqaatigineqartarneranniit amerlanerusut.
Canadamiut misissuinerisa ersersippaat, Baffinip Kangerliumarngani qilalukkat ilimagineqartumiit marloriaammik amerlanerusut. Kisitsinerit kingulliit ukiormanna ukiup aallartilaarnerani ingerlanneqartut ersersippaat qilalukkat 60.000-it missiliussagaat.
