Iluliarujussuaq takornarialerisunut isumalluartitsivoq

Iluliarujussuaq siorna aasakkut Avanersuarmi Petermann gletsjerimit kaanngartoq, Canadap kangianut ukiormanna takornariarniartunit takusarneqarluassangatinneqarpoq.
Allattoq Elisa Isaksen
maajip 25-at 2011 06:33

Iluliarujussuaq siorna aggustimi kaanngaqqaarami 260 kvadratkilometerinik annertussuseqaraluarpoq, Issittullu imartaani ukiuni 50-it sinneqartuni ilulissani annersaalluni.

Serminik immikkut ilisimasalik Charles Randell aviisimut Vancouver Sunimut oqarpoq, iluliarujussuaq taanna Paggivittamut anngussimasoq tamaanilu ikkarlisimaffimmini aserorterluni milliartulerumaartoq. Iluliarujussuup ilai New Foundlandip avannamut qeqertaasartaanit juulip naalernerani aggustillu aallartilaarnerani takuneqarsinnaassapput, immaqalu kujasinnerusumut ingerlaqqissinnaassallutik.

- Takornarianut ilulissanik takorusuttunut ukiormanna periarfissaqarluassaaq, Charles Rendall oqarpoq.

Canadami sikunut sillimaniarnermik suliaqartut iluliarujussuaq taanna alaatsinaattuarsimavaat, aamma siorna septembarimi marlunngorluni avittoq oqaatigaat.