Iluliarujussuaq iigarpoq

Iluliarujussuup iigarnera Internetikkut allaaserisaqartartoqatigiit nunarsuarmi tamaneersut, Artic Sea Ice Blogip, qaammataasanit assilisatigut siumorpaat.

Qallunaap Holtemeersup Espen Olsenip pisut qarasaasiaminiit malinnaaffigai:

- Bloggimi allaqatigiiffigisartakkatsinni soqutigisaqatiga allariataarpoq, asseq misissoqqullugu. Takusinnaavaralu Petermann Gletscherimi iigartoqartoq, Espen Olsen oqarpoq.

Taassuma inuussutissarsiutiginngikkaluarlugu sermini iigartartuni ineriartorneq ukiuni kingullerni arfinilinni arfineq marlunniluunniit malinnaaffigaa.

Artic Sea Ice Blogimilu serminik iigartartunik soqutiginnittunut taamanna iigartoqarnera ulluinnarsiutaanngilaq.

Tamakkorsuit ima angitigaat, qanimut takusimagaanni aatsaat paasineqarsinnaavoq qanoq angitiginersut, nukiit qanoq angitigisut maanna atuunnersut.

Nassuerutigissavaralu, iigarmat seqqorpallallarmallu taavaneerusukkaluallarama.

Sermeq iigartartoq, Petermann Gletscher, ukiut marluk matuma siorna iigarpoq, iluliarsuarlu 200 kvadratkilometerisut annertutigisoq pilersillugu.

Iluliarsuarlu Nunatta oqaluttuarisaanerani siumorneqarsimasut annertunersaraat.

Iluliarsuit Petermann Gletscherimiit ukiuni makkunani kaanngartartut, USA-mi Ohio State Universitymi issittoq pillugu ilisimatusarfimmi Byrdimi ilisimatuut ernumatartoqartippaat.

Ilisimatuut aarleqqutigaat, sermip iigartarnera sukkatsikkiartussasoq, tassalu sermip aannera maannamut takusartakkatsinniit sukkanerulissasoq.