Iluliarujussuaq ajoqusiisimassangatippaat
Kabelip ajoquserneri misissoreerlugit TELE Greenlandip tamanna ilimagaa - Nuup eqqaani sinerissamut qanittumi imaani ikkattumi ajoquteqalerneq pivoq.
Imaani kabelikkut attaveqartoqarsinnaanngoqqinnissaa marsip qeqqani pissasoq TELE Greenlandip ilimagaa, TELE-lli atuisui attaveqaateqarnikkut ajorseriartoqarneranik malugisaqassanngillat.
Imaani kabeli ikkussorneqarmalli ilulissanit ajoqusersinnaanissaa sillimaffigineqartoq manna tikillugu isumaqarsimagaluarput.
Illersuuteqarneq Nuummut toqqarneqartoq naammanngitsoq maanna paasinarsivoq, imaatigullu kabelimik ajoqusitsaaliuineq pitsaanerpaaq maannakkorpiaq naliliinermi tassaasorineqarpoq qillerinikkut kabelimik inissiineq. Tassa imaappoq, kabelip aqqutissaanik immap naqqata iluani qaarsumi sulluliortoqassaaq, kabelilu ima ititigisumut tassuuna ingerlasunngorneqassaaq immap naqqa ilulissanit attorneqarsinnaassanani, TELE Greenlandimit ilisimatitsipput.
Teknikkikkut misissuinerit suli naammassinngillat, taamaammat aaqqiissutissaq eqqortuunersoq oqaatigissallugu maanna suli siusippallaarpoq.
